news
یوٹیوبر رنویر الہ آبادیہ تنازع کا شکار، متنازع سوال پر ایف آئی آر درج
معروف یوٹیوبر رنویر الہ آبادیہ اس وقت شدید تنازع میں ہیں۔ حال ہی میں وہ کامیڈین سمے رائنا کے شو India’s Got Latent میں نظر آئے، جہاں انہوں نے ایک متنازع سوال پوچھ کر سوشل میڈیا پر ہنگامہ برپا کر دیا۔
ان کے اس سوال پر نہ صرف مداح ناراض ہوئے بلکہ ان کے خلاف ایف آئی آر بھی درج کر لی گئی ہے۔
رنویر نے ایک شو کے دوران ایک امیدوار سے اس کے والدین کے ازدواجی تعلق کے بارے میں ایک نازیبا سوال کیا تھا۔
یہ سوال اتنا غیر مہذب تھا کہ سوشل میڈیا صارفین نے رنویر کو سخت تنقید کا نشانہ بنایا۔ معاملہ اتنا بڑھ گیا کہ ان کے خلاف قانونی کارروائی کا آغاز بھی ہو گیا۔
یہ پہلا موقع نہیں ہے جب رنویر کسی تنازع میں پھنسے ہوں۔ گزشتہ سال جب اکشے کمار ان کے پوڈکاسٹ میں آئے تھے تو انہوں نے اداکار کے بارے میں کہا تھا: “سر، آپ کی آواز سے ہی ٹیسٹوسٹیرون نکلتا ہے! ایسا لگتا ہے کہ آپ کے دو نہیں بلکہ چار ہیں!”
شو کے تنازع کے بعد، رنویر نے ایک معافی نامہ جاری کیا اور کہا: “میرا تبصرہ صرف نامناسب نہیں تھا بلکہ یہ بالکل بھی مزاحیہ نہیں تھا۔ میں کوئی کامیڈین نہیں ہوں اور میں صرف معذرت چاہتا ہوں۔ یہ میرا ارادہ نہیں تھا کہ میں اپنے پلیٹ فارم کو اس طرح استعمال کروں۔”