news
پشاور میں معروف ٹک ٹاکر سائیکو ارباب پراسرار طور پر جاں بحق
پشاور:
پشاور کے علاقے ورسک روڈ پر معروف خاتون ٹک ٹاکر سائیکو ارباب پراسرار طور پر جاں بحق ہوگئی، جس کی نعش پوسٹمارٹم رپورٹ کے لیے اسپتال منتقل کر دی گئی ہے۔
خاتون ٹک ٹاکر کی ہلاکت پر مختلف خدشات کا اظہار کیا جا رہا ہے، تاہم پولیس نے گھر سے اہم شواہد اکٹھے کر کے انکوائری شروع کر دی ہے۔
گزشتہ روز تھانہ مچنی گیٹ پولیس کو بیان دیتے ہوئے محمد یسین، جو اسلام آباد کا رہائشی ہے، نے بتایا کہ اس کی بہن سیماگل عرف سائیکو ارباب ایک مشہور ٹک ٹاکر تھی۔ اسے اطلاع ملی کہ اس کی بہن گھر واقع ورسک روڈ میں موجود تھی، جہاں اس کی حالت بگڑ گئی تھی۔
انہوں نے یہ خدشہ بھی ظاہر کیا کہ اس کی موت مبینہ طور پر نشہ آور چیز کھانے کی وجہ سے ہوئی، مگر یہ بھی کہا کہ اس کی طبعی موت بھی واقع ہو سکتی ہے۔ مدعی کا کہنا تھا کہ ہماری کسی کے ساتھ کوئی دشمنی نہیں ہے۔
ادھر پولیس نے بتایا کہ نعش پوسٹمارٹم رپورٹ کے لیے منتقل کر دی گئی ہے اور گھر سے اہم شواہد اکٹھے کر لیے گئے ہیں۔ پوسٹمارٹم رپورٹ آنے کے بعد موت کی اصل وجہ معلوم ہو سکے گی۔
واضح رہے کہ متوفیہ ٹک ٹاک ویڈیوز بناتی تھی، جن میں سے کئی ویڈیوز سوشل میڈیا پر موجود ہیں۔