news
داسو ہائیڈرو پاور منصوبے کے لیے عالمی بینک سے پاکستان کو 1 ارب ڈالر قرض ملنے کا امکان
اسلام آباد:
عالمی بینک کی جانب سے پاکستان کے داسو ہائیڈرو پاور منصوبے کے لیے ایک ارب ڈالر کے نئے قرض کی منظوری کا امکان ہے۔
ذرائع کے مطابق، داسو ہائیڈرو پاور منصوبے کی لاگت میں 190.1 فیصد کا اضافہ ہوا ہے، جو کہ 1700 ارب روپے تک پہنچ گئی ہے۔ اس کی وجوہات میں زمین کے حصول میں تاخیر، سکیورٹی خدشات، اور امریکی ڈالر کی قدر میں 178 فیصد کا اضافہ شامل ہیں۔
داسو ہائیڈرو پاور منصوبے کا پہلا مرحلہ 2,160 میگاواٹ بجلی پیدا کرے گا، جبکہ دوسرے مرحلے کے بعد منصوبے کی مجموعی پیداوار 4,320 میگاواٹ تک پہنچ جائے گی۔ یہ بات بھی قابل ذکر ہے کہ عالمی بینک پہلے ہی 588 ملین ڈالر کا قرض اور 460 ملین ڈالر کی گارنٹی فراہم کر چکا ہے۔
ذرائع کا کہنا ہے کہ 800 ملین ڈالر بین الاقوامی ترقیاتی ایسوسی ایشن اور 200 ملین ڈالر بین الاقوامی بحالی و ترقیاتی بینک کے تحت فراہم کیے جائیں گے۔ بین الاقوامی ترقیاتی ایسوسی ایشن کے تحت 435 ملین ڈالر صفر سود پر اور 365 ملین ڈالر 5.83 فیصد شرح سود پر دیے جائیں گے۔
اسی طرح، بین الاقوامی بحالی و ترقیاتی بینک کے تحت 200 ملین ڈالر 6.13 فیصد شرح سود پر فراہم کیے جائیں گے۔ منصوبے کی تکمیل پہلے 2023-24 میں متوقع تھی، لیکن اب یہ 2027-28 میں مکمل ہوگا۔