جی ایچ کیو حملہ کیس: عمران خان کی بریت کی درخواست مسترد

جی ایچ کیو حملہ کیس میں عمران خان کی بریت کی درخواست مسترد کر دی گئی ہے۔ انسداد دہشت گردی عدالت راولپنڈی نے پراسیکیوشن کے دلائل سے اتفاق کرتے ہوئے تحریک انصاف کے بانی سمیت 3 افراد کی بریت کی درخواستیں مسترد کر دیں۔ تفصیلات کے مطابق، پیر کے روز راولپنڈی کی انسداد دہشت گردی عدالت کے جج امجد علی شاہ نے عمران خان، کرنل (ر) اجمل صابر اور سہیل عرفان عباسی کی 9 مئی جی ایچ کیو حملہ کیس میں دائر درخواست بریت کو مسترد کر دیا۔

انسداد دہشت گردی عدالت میں درخواستوں کی سماعت کے دوران پراسیکیوٹر ظہیر شاہ نے دلائل دیتے ہوئے کہا کہ مقدمے کا ٹرائل جاری ہے اور 12 عینی شاہدین کے بیانات ریکارڈ ہو چکے ہیں، اس لیے اس وقت درخواست بریت کی سماعت مناسب نہیں ہے۔

پراسیکیوٹر نے مزید کہا کہ عدالت کو پراسیکیوشن کو شہادت ریکارڈ کرانے کا موقع دینا چاہیے۔ اس سے پہلے شیخ رشید کی درخواست بریت بھی ٹرائل عدالت نے مسترد کی تھی، جبکہ ہائی کورٹ نے بھی ٹرائل کورٹ کا فیصلہ برقرار رکھا۔

دوسری جانب، اسلام آباد ہائی کورٹ نے پی ٹی آئی کے 24 نومبر ڈی چوک احتجاج کیس میں گرفتار 19 کارکنوں کی ضمانت بعد از گرفتاری منظور کر لی۔ جسٹس ثمن رفعت امتیاز نے سماعت کے دوران پی ٹی آئی کے 19 ورکرز کی ضمانت کی درخواستوں کو منظور کرتے ہوئے انہیں 50, 50 ہزار روپے کے ضمانتی مچلکے جمع کرانے کا حکم دیا۔