عدت نکاح کیس : عمران خان اور بشریٰ بی بی کی بریت کے خلاف اپیل مقرر

اسلام آباد ہائی کورٹ نے عدت نکاح کیس میں سابق وزیراعظم عمران خان اور ان کی اہلیہ سابقہ خاتون اول بشریٰ بی بی کی بریت کے خلاف خاور مانیکا کی اپیل کی سماعت کے لیے مقرر کر دی ہے۔ تفصیلات کے مطابق، اسلام آباد ہائی کورٹ میں تعینات نئے جج جسٹس اعظم خان کل بروز پیر اس کیس کی سماعت کریں گے۔ خاور مانیکا نے 13 جولائی 2024ء کو ایڈیشنل سیشن جج کے بریت کے فیصلے کو چیلنج کیا ہے اور درخواست میں اس فیصلے کو کالعدم قرار دینے کی استدعا کی ہے۔ ایڈیشنل سیشن جج نے 13 جولائی 2024ء کو بانی پی ٹی آئی اور بشریٰ بی بی کو عدت نکاح کیس میں بری کر دیا تھا۔

یہ بھی بتایا گیا ہے کہ خاور مانیکا نے ایڈیشنل سیشن جج کے فیصلے کے خلاف اپیل دائر کی ہے۔ ڈسٹرکٹ اینڈ سیشن کورٹس اسلام آباد نے عدت کے دوران نکاح کیس میں عمران خان اور بشریٰ بی بی کی سزا کے خلاف اپیلیں منظور کر کے انہیں باعزت طور پر بری کیا تھا۔ اس سے پہلے سینئر سول جج قدرت اللہ نے اڈیالہ جیل میں عدت نکاح کیس میں عمران خان اور بشریٰ بی بی کو 7، 7 سال قید کی سزا سنائی تھی۔ دوران سماعت، بانی پی ٹی آئی کی طرف سے وکیل سلمان اکرم راجہ اور بشریٰ بی بی کی جانب سے وکیل عثمان ریاض گل نے استغاثہ کے چاروں گواہوں پر جرح کی تھی، جن میں خاور مانیکا، عون چوپدری، نکاح خواں مفتی سعید شامل تھے۔