news
علی امین گنڈاپور سے پی ٹی آئی خیبرپختونخواہ کی صدارت واپس
علی امین گنڈاپور سے صدر پی ٹی آئی خیبرپختونخواہ کا عہدہ واپس لے لیا گیا ہے۔
بانئ پی ٹی آئی نے جنید اکبر کو پی ٹی آئی خیبرپختونخواہ کا صدر مقرر کر دیا ہے۔
پارٹی کے سیکریٹری جنرل سلمان اکرم راجہ کو جنید اکبر کی تقرری کا نوٹیفکیشن جاری کرنے کی ہدایت کی گئی ہے۔
بیرسٹر گوہر نے کہا کہ اگر کمیشن نہیں بنے گا تو ہم حکومت کے ساتھ صرف فوٹو سیشن کے لیے نہیں بیٹھ سکتے۔
بانئ پی ٹی آئی نے سلمان اکرم راجہ کو پنجاب میں پارٹی کی تشکیل نو کے لیے مشاورت کرنے کی ہدایت کی ہے۔
ذرائع کے مطابق، بانئ پی ٹی آئی نے کے پی میں کرپشن کے معاملات پر تحفظات کا اظہار کیا ہے اور علی امین کو پیغام دیا تھا کہ وہ ڈیرہ اسماعیل خان کی سیاست سے باہر نکلیں۔
ذرائع نے بتایا کہ بانئ پی ٹی آئی جنید اکبر اور عاطف خان سے کافی دیر تک گفتگو کرتے رہے اور انہوں نے جنید اکبر کو کے پی میں پارٹی معاملات درست کرنے کا ٹاسک دے دیا۔
اس حوالے سے سلمان اکرم راجہ کا کہنا ہے کہ علی امین گنڈاپور خود بھی چاہتے تھے کہ وہ پارٹی صدارت اپنے پاس نہ رکھیں۔
انہوں نے یہ بھی کہا کہ بانئ پی ٹی آئی نے علی امین گنڈاپور کو ہدایت کی ہے کہ وہ صوبے میں دہشت گردی اور گورننس کے معاملات پر توجہ دیں۔