پاکستان تحریک انصاف نے 26ویں آئینی ترمیم کے خلاف سپریم کورٹ سے رجوع کر لیا ہے۔ پی ٹی آئی نے یہ درخواست وکیل سمیر کھوسہ کے ذریعے دائر کی ہے، جس میں 26 ویں آئینی ترمیم کو چیلنج کیا گیا ہے۔ درخواست میں استدعا کی گئی ہے کہ اس ترمیم کو کالعدم قرار دیا جائے۔ دائر کردہ درخواست میں یہ موقف اختیار کیا گیا ہے کہ پارلیمنٹ آئین کے بنیادی خدوخال میں تبدیلی نہیں کر سکتی۔

عدلیہ کی آزادی آئین کا ایک بنیادی جزو ہے، اور اس کے خلاف کوئی ترمیم نہیں کی جا سکتی۔ آئینی ترمیم اختیارات کی تقسیم کے آئینی اصول کے بھی خلاف ہے۔ تحریک انصاف نے درخواست میں یہ بھی کہا ہے کہ آئینی ترمیم پر فیصلے تک قائم جوڈیشل کمیشن کو ججز کی تعیناتی سے روکا جائے۔

پی ٹی آئی کی جانب سے دائر کردہ درخواست میں یہ بھی کہا گیا ہے کہ 26 ویں آئینی ترمیم کے تحت ہونے والے تمام اقدامات کو کالعدم قرار دیا جائے اور ترمیم پر فیصلے تک قائم جوڈیشل کمیشن کو ججز کی تعیناتی سے روکا جائے۔

قبل ازیں یہ بتایا گیا تھا کہ 26ویں آئینی ترمیم کے خلاف کیس کی سماعت سپریم کورٹ کے لارجر بینچ کرے گا۔ سپریم کورٹ میں 26 ویں آئینی ترمیم سے متعلق سماعت کے لیے خصوصی انتظامات کیے گئے تھے۔ سپریم کورٹ کی جانب سے جاری کردہ اعلامیہ میں کہا گیا تھا کہ 27 جنوری کو کورٹ روم نمبر 2 میں 26ویں آئینی ترمیم کی سماعت ہوگی۔