news
پاکستان میں آئی ٹی اور کان کنی میں امریکی سرمایہ کاری کی دعوت
وفاقی وزیرِ داخلہ محسن نقوی نے پاکستان میں کان کنی اور آئی ٹی کے شعبے میں امریکی سرمایہ کاروں کو سرمایہ کاری کی دعوت دی۔
محسن نقوی نے یو ایس چیمبر آف کامرس کا دورہ کیا اور امریکا پاکستان بزنس کونسل کے وفد سے ملاقات کی۔
اس ملاقات میں مائننگ اور انفارمیشن ٹیکنالوجی کے شعبوں میں سرمایہ کاری اور تعاون کو بڑھانے پر تفصیلی گفتگو کی گئی۔
وزیرِ داخلہ محسن نقوی نے نیشنل پولیس اکیڈمی کو یونیورسٹی کا درجہ دینے کا اعلان بھی کیا۔
اس موقع پر بات چیت کرتے ہوئے محسن نقوی نے کہا کہ یو ایس پاکستان بزنس کونسل پاکستان میں سرمایہ کاری کے بے شمار مواقع سے فائدہ اٹھا سکتی ہے۔
انہوں نے یہ بھی کہا کہ امریکی کمپنیوں کے مسائل کو ترجیحی بنیادوں پر حل کیا جائے گا، اور پاکستان معاشی استحکام کی جانب بڑھ رہا ہے، جس کے تحت امریکا پاکستان بزنس کونسل کو پاکستان میں سرمایہ کاری کی دعوت دی جاتی ہے۔
محسن نقوی نے مزید کہا کہ پاکستان میں سرمایہ کاری کے لیے بہت سے پُرکشش مواقع موجود ہیں، اور ضروری این او سیز کے اجراء میں بہتری لائی گئی ہے۔
وزیرِ داخلہ نے امریکا پاکستان بزنس کونسل کو خصوصی سہولیات فراہم کرنے کی یقین دہانی بھی کروائی۔