لاہور:
امریکی ہارورڈ یونیورسٹی کے محققین کی ایک نئی تحقیق نے ایک بڑا انکشاف کیا ہے کہ دنیا بھر میں محققین اور طلبہ اپنے مقالہ جات اور امتحانی پیپروں کی تیاری کے لیے chatgpt اور دیگر مصنوعی ذہانت کے سافٹ ویئرز کی مدد لینے لگے ہیں۔

پروف ریڈنگ تک تو سب کچھ ٹھیک تھا، لیکن اب تو مقالوں کا ایک بڑا حصہ اے آئی کے ذریعے تیار ہونے لگا ہے۔ اس ابھرتے ہوئے رجحان کا ایک بڑا منفی پہلو یہ ہے کہ انٹرنیٹ پر موجود جھوٹا، غیر معیاری، جعلی اور شر انگیز مواد بھی اب مقالات اور امتحانی تیاری کا حصہ بننے لگا ہے۔

اس لیے سائنس اور ٹیکنالوجی کی دنیا میں سامنے آنے والے تحقیقی مقالوں میں غیر مستند مواد کی تعداد میں اضافہ ہو چکا ہے۔

سائنس دانوں نے اس رجحان پر شدید تشویش کا اظہار کیا ہے کہ chatgpt وغیرہ کی مدد سے تیار کردہ مقالے مستند اور قابل اعتبار نہیں کہلائے جا سکتے۔

یہ بات واضح ہے کہ chatgpt اور دیگر اے آئی پروگرام دنیا میں نقل کرنے والوں کے لیے ایک سہولت فراہم کر رہے ہیں۔

ان کی وجہ سے محققین اور طلبہ میں محنت اور تحقیق کرنے کے بجائے نقل کرنے کا رجحان بڑھتا جا رہا ہے۔ اس سے ان کی ذہنی اور جسمانی صلاحیتیں متاثر ہوں گی اور کاہلی و تن آسانی غالب آ جائے گی۔ یہ بنی نوع انسان کے مستقبل کے لیے اچھی خبر نہیں ہے۔

اسلام آباد:
وفاقی حکومت نے وزیر خزانہ محمد اورنگزیب کی قیادت میں باضابطہ طور پر کرپٹو کونسل قائم کر دی ہے، جو مؤثر پالیسی سازی، جدیدیت کے فروغ اور محفوظ مالیاتی نظام کے قیام میں اہم کردار ادا کرے گی۔

وزارت خزانہ کی جانب سے جاری کردہ بیان کے مطابق، وزیر خزانہ محمد اورنگزیب پاکستان کرپٹو کونسل کے سربراہ ہوں گے، جبکہ وزیر خزانہ کے چیف ایڈوائزر بلال بن ثاقب کو اس کونسل کا سی ای او مقرر کیا گیا ہے۔

اعلامیے میں یہ بھی کہا گیا کہ بلال ثاقب بلاک چین ٹیکنالوجی، سرمایہ کاری کی حکمت عملی اور ڈیجیٹل جدت کے شعبے میں اپنی مہارت کے ذریعے اس اقدام کی قیادت کریں گے۔

وزارت خزانہ نے مزید بتایا کہ پاکستان کرپٹو کونسل کے بورڈ میں گورنر اسٹیٹ بینک آف پاکستان، چیئرمین سیکیورٹیز اینڈ ایکسچینج کمیشن آف پاکستان (ایس ای سی پی)، وفاقی سیکریٹری قانون اور وفاقی سیکریٹری شامل ہیں۔

کونسل کے بارے میں کہا گیا کہ یہ کرپٹو اپنانے کے لیے واضح ضابطہ جاتی ہدایات مرتب کرنے کی سفارشات پیش کرے گی اور عالمی کرپٹو اور بلاک چین تنظیموں کے ساتھ روابط قائم کر کے بہترین عالمی روایات اپنانے میں تجاویز دے گی۔

وزارت خزانہ نے یہ بھی بتایا کہ کونسل مالیاتی ٹیکنالوجی، اسٹارٹ اپس، سرمایہ کاروں اور بلاک چین ڈیولپرز کے ساتھ مل کر ذمہ دارانہ جدت کو فروغ دے گی۔