news
ایمریٹس ایئرلائن کا کراچی ایئرپورٹ پر کارگو بزنس حب بنانے کا فیصلہ
ایمریٹس ایئرلائن نے پاکستان میں اپنے کاروبار کے حوالے سے ایک اہم فیصلہ کیا ہے اور کراچی ایئرپورٹ پر کارگو بزنس حب قائم کرنے کے لیے ایئرپورٹس اتھارٹی سے رابطہ کیا ہے۔
رپورٹ کے مطابق، ایمریٹس ائیرلائن نے کراچی ایئرپورٹ پر کارگو ٹرمینل کے لیے 90 ہزار اسکوائر فٹ جگہ کی درخواست دی ہے۔ کارگو بزنس کی بڑھتی ہوئی طلب کے پیش نظر، ایمریٹس نے کراچی میں اپنا کارگو حب قائم کرنے کا فیصلہ کیا ہے۔
اس وقت کراچی میں سب سے زیادہ کارگو بزنس ایمریٹس ائیرلائن کا ہے، اور صرف کراچی سے 2024 کے دوران 27 ہزار ٹن سے زائد کارگو ایمریٹس نے اٹھایا ہے۔
پی آئی اے کی عدم توجہی اور منصوبہ بندی کی کمی کی وجہ سے 2024 کے دوران کراچی سے صرف 2 ہزار ٹن کارگو کا بزنس حاصل کر سکی۔
ذرائع کے مطابق، ایمریٹس ائیرلائن کی درخواست پر ایئرپورٹ اتھارٹی نے کارگو ٹرمینل کے لیے جگہ فراہم کرنے کے عمل کا آغاز کر دیا ہے۔