news
حکومت کا پی ٹی آئی کے جوڈیشل کمیشن کے مطالبے کو مسترد کرنے کا فیصلہ
حکومت نے پاکستان تحریک انصاف کی مذاکراتی کمیٹی کے مطالبات پر جواب تیار کرتے ہوئے 9 مئی 2023 کے واقعات کی تحقیقات کے لیے جوڈیشل کمیشن کے قیام کا پی ٹی آئی کا مطالبہ مسترد کر دیا ہے۔
رپورٹ کے مطابق، ذرائع کا کہنا ہے کہ حکومت کی مذاکراتی کمیٹی نے پی ٹی آئی کے دو نکاتی مطالبات کا جائزہ لیا، اور اس دوران حکومتی مذاکراتی کمیٹی نے پی ٹی آئی کمیٹی کے لیے جواب تیار کر لیا ہے۔
ذرائع کے مطابق، حکومت نے 9 مئی سے متعلق جوڈیشل کمیشن نہ بنانے کا فیصلہ کیا ہے۔
حکومت کا مؤقف ہے کہ 9 مئی کو جی ایچ کیو پر اور کورکمانڈر کے گھر پر حملہ ہوا، اس روز شہدا کی یادگاروں اور مجسموں کی بے حرمتی کی گئی، اور اس دن منظم منصوبہ بندی کے تحت فوجی تنصیبات کو نشانہ بنایا گیا۔
ذرائع کے مطابق، حکومت کا کہنا ہے کہ عدالتوں میں زیر سماعت مقدمات پر جوڈیشل کمیشن نہیں بنایا جا سکتا، کیونکہ 9 مئی سے متعلق عدالتوں میں چالان پیش ہو چکے ہیں اور اس دن کا کوئی سیاسی قیدی نہیں ہے۔
حکومتی جواب میں کہا گیا کہ پی ٹی آئی کے مطالبات کا حقائق سے کوئی تعلق نہیں ہے۔
ذرائع کے مطابق، حکومت کی مذاکراتی کمیٹی کی جانب سے پی ٹی آئی کو جواب مذاکراتی کمیٹی کے چوتھے دور میں تحریری طور پر دیا جائے گا۔