ملتان ٹیسٹ: پاکستان 230 پر آؤٹ، ویسٹ انڈیز کی بیٹنگ مشکلات کا شکار

ملتان ٹیسٹ کے دوسرے روز ویسٹ انڈیز کے خلاف پاکستان کی پوری ٹیم 230 رنز پر ڈھیر ہوگئی، جس کے بعد ویسٹ انڈیز کی بیٹنگ لائن بھی پاکستانی اسپنرز کے سامنے مشکلات کا شکار نظر آ رہی ہے۔

پاکستان نے دوسرے روز ویسٹ انڈیز کے خلاف 4 وکٹ کے نقصان پر 143 رنز کے ساتھ نامکمل اننگز کا دوبارہ آغاز کیا۔ کھیل شروع ہوتے ہی پاکستانی بیٹرز کی وکٹیں گرنے لگیں۔

دوسرے روز کھیل کے آغاز پر ہی سعود شکیل اور محمد رضوان کی شراکت ختم ہوگئی۔ سعود شکیل 84 رنز پر آؤٹ ہوئے، اس کے بعد سلمان آغا میدان میں آئے لیکن وہ بھی 7 رنز پر آؤٹ ہوگئے، جبکہ محمد رضوان 71 رنز بنا کر پویلین لوٹ گئے۔

محمد رضوان کے بعد نعمان علی کریز پر آئے، لیکن وہ بھی بغیر کوئی رن بنائے چلتے بنے، جبکہ خرم شہزاد 7 رنز بنا کر آؤٹ ہوئے۔ پہلے روز کپتان شان مسعود 11، محمد ہریرہ 6، بابر اعظم 8 اور کامران غلام 5 رنز بنا کر آؤٹ ہوئے تھے، جس کے بعد محمد رضوان اور سعود شکیل نے شراکت قائم کر کے اسکور 4 وکٹ پر 143 رنز تک پہنچایا۔

ویسٹ انڈیز کی جانب سے جومل اور جیڈن سیلز نے 3، 3 کھلاڑیوں کو آؤٹ کیا، گوڈاکیش موتی نے ایک وکٹ حاصل کی جبکہ کیون نے 2 وکٹیں حاصل کیں۔

خراب موسم کی وجہ سے پہلے دن صرف 41.3 اوور کا کھیل ہوسکا تھا۔ ٹیسٹ سیریز اے اسپورٹس پر براہ راست دکھائی جا رہی ہے۔