بیرسٹر سیف: پی ٹی آئی اور عسکری قیادت کی ملاقات پر حکومتی ردعمل

مشیراطلاعات خیبرپختونخواہ بیرسٹر سیف نے کہا ہے کہ پی ٹی آئی اور عسکری قیادت کے درمیان ملاقات کے بعد نواز شریف کیمپ میں بے چینی بڑھ گئی ہے۔ انہوں نے یہ بھی بتایا کہ حکومتی مذاکراتی کمیٹی کو غیر موثر بنانے کی کوششیں شروع ہو چکی ہیں، اور نواز شریف نے اپنی ٹیم کو مذاکرات ناکام بنانے کا ہدف سونپ دیا ہے۔ ان کے مطابق، ایسے عناصر سرگرم ہیں جو ملک میں سیاسی استحکام کی راہیں کھلنے نہیں دینا چاہتے۔

بیرسٹر سیف نے حکومتی وزراء سے درخواست کی کہ وہ اپنے حلف کا پاس رکھتے ہوئے پی ٹی آئی اور عسکری قیادت کی ملاقات پر سیاست نہ کریں۔ انہوں نے کہا کہ پی ٹی آئی ملک میں امن کے قیام کے لیے مذاکرات کی راہ پر گامزن ہے، جبکہ غیر منتخب عناصر اپنے ناجائز اقتدار کو بچانے کے لیے مذاکرات کو ناکام بنانے کی کوشش کر رہے ہیں۔

انہوں نے مزید کہا کہ اطلاعات ہیں کہ نواز شریف نے اپنی ٹیم کو مذاکرات ناکام بنانے کی ہدایت دے دی ہے۔ یہ بھی یاد رہے کہ گزشتہ روز بیرسٹر سیف نے کہا تھا کہ بانی پی ٹی آئی عمران خان کو جعلی مقدمے میں سزا سنانا انتہائی افسوسناک ہے۔

انصاف میں تاخیر نے انصاف سے انکار کی تصدیق کر دی ہے۔ تین بار فیصلہ موخر کرنے سے انصاف کا جنازہ نکل گیا تھا۔ بیرسٹر سیف نے القادر ٹرسٹ کیس میں عمران خان کو عدالت کی جانب سے سزا سنائے جانے کے فیصلے پر بھی ردعمل دیا۔