news
ای سی سی اجلاس: اہم معاشی فیصلوں کی توقع
وفاقی کابینہ کی اقتصادی رابطہ کمیٹی کا اجلاس آج وزیر خزانہ محمد اورنگزیب کی زیر صدارت منعقد ہوگا۔
اجلاس میں 8 نکاتی ایجنڈے پر غور کیا جائے گا، جس میں معیشت اور مالیاتی امور سے متعلق اہم فیصلے متوقع ہیں۔ اسٹیل مصنوعات پر ریگولیٹری ڈیوٹی میں توسیع کی منظوری بھی دیے جانے کا امکان ہے۔
ذرائع کے مطابق، وزارت خارجہ کی تکنیکی ضمنی گرانٹ کی منظوری اور پاکستان اسٹیل ملز کے ملازمین کی سال 2024-25 کی تنخواہوں کے لیے فنڈز کی منظوری پر بھی غور کیا جائے گا۔ فرنٹیئر کور کے لیے بھی سال 2024-25 کے فنڈز کی منظوری زیر بحث آئے گی۔ اجلاس میں افغان ٹرانزٹ ٹریڈ کے لیے بینک گارنٹی کی واپسی کے معاملے پر بھی بات چیت کی جائے گی۔
ذرائع کا مزید کہنا ہے کہ وزارت قومی تحفظ خوراک کے لیے 91 کروڑ روپے کی گرانٹ اور وزارت سمندر پار پاکستانیوں کے سال 2023-24 کے بجٹ تخمینے کی منظوری کے ساتھ ساتھ سالانہ ری بیسنگ ٹائم لائن پر نظر ثانی کی بھی توقع ہے۔