news
وزیراعظم شہباز شریف کا غزہ جنگ بندی معاہدے کا خیرمقدم
اسلام آباد:
وزیراعظم شہباز شریف نے غزہ میں جنگ بندی کے اعلان کا خیرمقدم کیا ہے جس کا طویل عرصے سے انتظار کیا جا رہا تھا۔
سماجی رابطے کی ویب سائٹ ایکس پر ایک پوسٹ میں انہوں نے اس معاہدے کو عملی شکل دینے میں قطر، سعودی عرب، امریکہ، مصر اور دیگر ممالک کی محنت کو سراہا۔
شہباز شریف نے کہا کہ غزہ اور دیگر جنگ زدہ علاقوں میں انسانی امداد کی فوری ترسیل بہت ضروری ہے۔
وزیراعظم نے امید ظاہر کی کہ جنگ بندی کے معاہدے پر مکمل طور پر عمل کیا جائے گا۔
انہوں نے کہا کہ پاکستان فلسطینی عوام کے ساتھ یکجہتی کا اظہار کرتا ہے اور گزشتہ کئی دہائیوں سے اسرائیلی جارحیت کے خلاف جدوجہد کرنے والوں کو خراج عقیدت پیش کرتا ہے۔
وزیراعظم نے اقوام متحدہ کی قراردادوں کے مطابق مسئلہ فلسطین کے دو ریاستی حل کے لیے پاکستان کے مطالبے کا اعادہ کیا۔