گوگل پے مارچ 2025 میں پاکستان میں لانچ کے لیے تیار

گوگل پے، جو ایک عالمی ڈیجیٹل ادائیگی کا پلیٹ فارم ہے، مارچ 2025 کے وسط تک پاکستان میں باضابطہ طور پر متعارف کرایا جائے گا۔

ذرائع کے مطابق، نومبر 2024 میں گوگل کی جانب سے تصدیق شدہ اس پلیٹ فارم کو ویزا، ماسٹر کارڈ اور مقامی بینکوں کے ساتھ تعاون کے ذریعے سہولت فراہم کی جائے گی۔

یہ ڈیجیٹل سروس پاکستانی صارفین کو اپنے بینک سے جاری کردہ ڈیبٹ اور کریڈٹ کارڈز کو گوگل والیٹ ایپ کے ذریعے گوگل پے سے لنک کرنے کی اجازت دے گی، جس سے صارفین بغیر کسی رابطے کے ڈیجیٹل ادائیگی کی سہولت سے فائدہ اٹھا سکیں گے۔

اگرچہ گوگل ایپ کی ابتدائی لانچ بنیادی طور پر contactless ادائیگیوں پر توجہ مرکوز کرے گی، لیکن گوگل والیٹ کی مکمل خصوصیات جیسے لائلٹی کارڈز اور پبلک ٹرانسپورٹ پاس پہلے مرحلے میں دستیاب نہیں ہوں گے۔

ذرائع نے تصدیق کی ہے کہ لانچ کی تیاریاں جاری ہیں اور چار سے چھ بڑے بینک تکنیکی ضروریات کو پورا کرنے کے لیے ویزا اور ماسٹر کارڈ کے ساتھ کام کر رہے ہیں۔

اسٹیٹ بینک آف پاکستان کے مطابق، پاکستان کا ادائیگی کا بنیادی ڈھانچہ اس سروس کو سپورٹ کرنے کے لیے اچھی حالت میں ہے، جس میں 133,000 پوائنٹ آف سیل (پی او ایس) ٹرمینلز شامل ہیں، جن میں سے 99 فیصد پہلے ہی موبائل کنٹیکٹ لیس ادائیگیوں کے لیے مکمل طور پر تیار ہیں۔