کراچی سے وسطی ایشیا کے لیے تجارتی قافلہ روانہ، این ایل سی اور ڈی پی ورلڈ کی شراکت داری

کراچی:
این ایل سی اور ڈی پی ورلڈ کی شراکت داری سے تجارتی سامان لے کر پہلا قافلہ کراچی سے وسطی ایشیا کے لیے روانہ ہوگیا۔

نیشنل لاجسٹکس کارپوریشن (این ایل سی) اور ڈی پی ورلڈ کی مشترکہ کمپنی کے ذریعے متعدد تجارتی سامان پر مشتمل کنٹینرز کا پہلا قافلہ کراچی سے وسطی ایشیائی ریاستوں کی طرف روانہ ہوا۔ یہ ایک تاریخی لمحہ ہے جو دونوں بڑے لاجسٹکس اداروں کی باہمی شراکت داری کا نتیجہ ہے۔

تجارتی قافلے کی روانگی کے موقع پر کراچی میں ایک شاندار تقریب منعقد کی گئی، جہاں ڈی پی ورلڈ کے گروپ چیئرمین اور سی ای او سلطان احمد بن سولیم نے وسطی ایشیائی ریاستوں کے لیے کارگو سروس کا افتتاح کیا۔ اس موقع پر ڈی پی ورلڈ اور این ایل سی کے سینئر حکام کے ساتھ ساتھ معروف کاروباری شخصیات بھی موجود تھیں۔

سلطان احمد بن سولیم نے اس موقع پر گفتگو کرتے ہوئے کہا کہ دونوں اداروں کے درمیان یہ تعاون پورے خطے میں رابطوں اور تجارت کو فروغ دینے کے لیے ایک نئے دور کا آغاز کرے گا۔ این ایل سی کی خطے میں موجودہ حیثیت اور ڈی پی ورلڈ کی عالمی سطح پر موجودگی سے بے شمار کاروباری مواقع پیدا ہوں گے، جس سے اقتصادی سرگرمیوں میں اضافہ ہوگا۔

انہوں نے مزید کہا کہ اس پیشرفت سے کاروبار میں آسانی پیدا ہوگی اور ترسیل کی لاگت اور وقت میں نمایاں کمی واقع ہوگی۔