film
فرانسیسی خاتون جعلی بریڈ پٹ کے جال میں 7 لاکھ پاؤنڈ سے محروم
ایک 53 سالہ فرانسیسی خاتون، جو ایک انٹیریئر ڈیزائنر ہیں، جعلی بریڈ پٹ کے جال میں پھنس کر تقریباً 7 لاکھ پاؤنڈز کھو بیٹھی ہیں۔
غیر ملکی میڈیا کی رپورٹ کے مطابق، ایک شخص نے خود کو مشہور ہالی ووڈ اداکار بریڈ پٹ ظاہر کیا اور خاتون کو اپنی ’کینسر کے علاج‘ کے لیے رقم دینے پر مجبور کیا۔
متاثرہ خاتون نے بتایا کہ فروری 2023 میں، انہیں انسٹاگرام پر ایک پیغام موصول ہوا جس میں دعویٰ کیا گیا کہ میسج کرنے والی خاتون بریڈ پٹ کی والدہ ہیں۔ اگلے دن، اس خاتون کے بیٹے ’بریڈ پٹ‘ نے این سے رابطہ کیا اور کہا کہ اس کی والدہ نے اس کے بارے میں بہت باتیں کی ہیں۔
اس کے بعد دونوں کے درمیان ایک سال تک روزانہ کی بات چیت، اشعار، اور جعلی تصاویر و ویڈیوز کا تبادلہ ہوتا رہا، جس کی وجہ سے خاتون نے اس شخص پر اعتماد کر لیا اور اسے اصلی بریڈ پٹ سمجھ لیا۔
آن لائن فراڈ کرنے والے جعلساز نے این سے کہا کہ وہ ’کینسر‘ کا شکار ہے اور اس بیماری کے علاج کے لیے مالی مدد چاہتا ہے، کیونکہ اس کی سابقہ اہلیہ، اداکارہ انجلینا جولی سے طلاق کی وجہ سے اس کی تمام رقم اور اکاؤنٹس بلاک ہیں۔
این اس جعلساز کے محبت میں اتنی مگن ہو گئیں کہ نہ صرف انہوں نے 6 لاکھ 70 ہزار پاؤنڈز منتقل کیے بلکہ اپنے شوہر سے بھی طلاق لے لی۔