news
گورنر خیبرپختونخوا: وزیراعلیٰ پر اعتماد نہیں، صوبے میں انتشار نہیں پھیلنے دیں گے
پشاور:
خیبرپختونخوا کے گورنر فیصل کریم کنڈی نے کہا ہے کہ ہمیں وزیراعلیٰ علی امین گنڈاپور پر اعتماد نہیں ہے۔
صوبائی دارالحکومت میں ایک تقریب سے خطاب کرتے ہوئے گورنر نے کہا کہ صوبے میں لوٹ مار کا بازار گرم ہے۔ نوکریاں اور تبادلے پیسوں کے عوض ہو رہے ہیں۔ ہمیں وزیراعلیٰ پر اعتماد نہیں ہے کیونکہ وہ اپنے ضلع کو بھی سنبھال نہیں سکتے۔ جو بھی ہو، ہم ملک میں انتشار پھیلانے کی اجازت نہیں دیں گے۔
گورنر نے مزید کہا کہ انہوں نے آرمی چیف سے ملاقات کی ہے اور نیشنل ایکشن پلان پر عمل درآمد کریں گے۔ اگر وفاقی حکومت اور فوج مداخلت کریں تو معاملات بہتر ہوں گے۔ جو بھی پاکستان کے آئین اور قانون کی پاسداری نہیں کرے گا، اس کے خلاف سختی سے نمٹا جائے گا۔ وزیراعلیٰ علی امین گنڈاپور اپنی باتیں کرتے ہیں، لیکن صوبے کے مسائل پر نہیں۔ وہ خود اسلام آباد میں احتجاج کرتے ہیں اور پشاور میں بلدیاتی نمائندوں پر لاٹھی چارج کرتے ہیں۔ ہم نے ایک پرامن صوبہ دیا تھا، لیکن انہوں نے انتشار پھیلا دیا۔
فیصل کریم کنڈی نے یہ بھی کہا کہ مولانا فضل الرحمن کو مسیحا بنا دیا گیا ہے۔ پی ٹی آئی این آر او کے لیے پاؤں پڑ رہی ہے۔ شرائط پر مذاکرات نہیں ہوتے، جبکہ پاکستان پیپلز پارٹی مذاکرات پر یقین رکھتی ہے۔