news
پی ٹی آئی رہنما شیر افضل مروت کو ایک اور شوکاز نوٹس جاری
پاکستان تحریک انصاف (پی ٹی آئی) کے بانی چیئرمین عمران خان کی ہدایت پر پارٹی رہنما شیر افضل مروت کو ایک بار پھر شوکاز نوٹس جاری کیا گیا ہے۔ نجی ٹی وی کی رپورٹ کے مطابق، نوٹس میں کہا گیا ہے کہ آپ بغیر سوچے سمجھے بولتے ہیں، جس کا اثر پارٹی پر پڑتا ہے۔
شوکاز نوٹس میں شیر افضل مروت کو مخاطب کرتے ہوئے کہا گیا ہے کہ آپ کے بیانات کے بارے میں عمران خان کو آگاہ کیا گیا تھا۔ بانی چیئرمین کی ہدایت کے بعد پارٹی کی جانب سے رویے میں بہتری لانے کے لیے یہ نوٹس جاری کیا گیا۔ نوٹس کے مطابق، شیر افضل مروت کو 7 دن کے اندر پارٹی کو تحریری جواب جمع کروانے کی ہدایت کی گئی ہے۔ اگر وہ مطلوبہ وقت میں جواب نہیں دیتے تو پارٹی پالیسی کے مطابق کارروائی کی جائے گی۔
دوسری جانب، پی ٹی آئی رہنما شیر افضل مروت نے دوستوں کے مشورے پر ایک دو ہفتے کے لیے الیکٹرانک میڈیا سے دور رہنے کا فیصلہ کیا ہے۔ سماجی رابطے کی سائٹ “ایکس” پر جاری بیان میں انہوں نے میڈیا کے دوستوں سے درخواست کی ہے کہ وہ کسی بھی پروگرام میں شامل ہونے پر اصرار نہ کریں۔ واضح رہے کہ مئی 2024 میں بھی شیر افضل مروت کو شوکاز نوٹس جاری کیا گیا تھا، جب انہیں پی ٹی آئی رہنماﺅں شبلی فراز اور عمر ایوب کے خلاف غیر ذمہ دارانہ بیانات دینے پر نوٹس دیا گیا تھا۔