ڈاکٹر عافیہ صدیقی کیس کی سماعت 24 جنوری تک ملتوی

اسلام آباد ہائی کورٹ نے امریکا میں قید ڈاکٹر عافیہ صدیقی کی رہائی اور وطن واپسی کے معاملے کی سماعت 24 جنوری تک ملتوی کر دی۔

جسٹس سردار اعجاز اسحاق خان نے اس کیس کی سماعت کی۔

ایڈیشنل اٹارنی جنرل منور اقبال دوگل دوسری عدالت میں ہونے کی وجہ سے پیش نہیں ہوئے۔

سماعت کے دوران ڈاکٹر فوزیہ صدیقی کے وکیل عمران شفیق نے بتایا کہ وزیرِ اعظم کے امریکی صدر کو بھیجے گئے خط کا جواب ابھی تک موصول نہیں ہوا، اور امریکا کی جانب سے بھی یہ نہیں بتایا گیا کہ خط وصول ہوا ہے یا نہیں۔
اسلام آباد ہائی کورٹ نے کہا کہ عافیہ صدیقی کیس کے حوالے سے آئندہ ہفتہ اہم ہے، وزارت خارجہ کو ڈاکٹر فوزیہ صدیقی کی مدد کرنی چاہیے، اور 20 دسمبر کو وزیرِ اعظم کے بیرون ملک دوروں کی تفصیلات جمع کرانے کا حکم دیا تھا۔

وزارت خارجہ کے نمائندے نے کہا کہ سیکریٹری خارجہ چین میں ہیں، اس لیے وہ تفصیلات فراہم نہیں کر سکے، مزید وقت دیا جائے۔

عدالت نے وزیرِ اعظم کے بیرون ملک دوروں کی تفصیلات فراہم کرنے کے لیے اگلے ہفتے تک مہلت دے دی۔

درخواست گزار کے وکیل عمران شفیق نے کہا کہ ڈاکٹر عافیہ صدیقی کی بہن ڈاکٹر فوزیہ صدیقی امریکا پہنچ چکی ہیں، لیکن ان کی ابھی تک امریکا میں تعینات پاکستانی سفیر سے ملاقات نہیں ہو سکی۔

عدالت نے کہا کہ وزارتِ خارجہ کو یہ یقینی بنانا چاہیے کہ ڈاکٹر فوزیہ صدیقی کی ملاقات امریکا میں پاکستانی سفیر سے ہو۔