کنگنا رناوت کا فلم ‘ایمرجنسی’ کی ریلیز کے فیصلے پر اعترافِ غلطی

بالی ووڈ کی معروف اداکارہ کنگنا رناوت نے اپنی ہدایت کاری میں بننے والی پہلی فلم ’ایمرجنسی‘ کے حوالے سے اپنے فیصلوں میں غلطی کا اعتراف کیا ہے۔

بھارتی میڈیا کے مطابق ایک حالیہ انٹرویو میں کنگنا نے کہا کہ فلم کو سینما گھروں میں ریلیز کرنا ایک غلط فیصلہ تھا۔ انہوں نے وضاحت کی کہ آن لائن پلیٹ فارم پر ریلیز کرنا زیادہ بہتر ہوتا، کیونکہ موجودہ حالات میں وہ فلم کی سینما ریلیز میں تاخیر سے خوفزدہ ہیں۔

ایمرجنسی میں سابق بھارتی وزیراعظم اندرا گاندھی کا کردار ادا کرنے والی کنگنا نے انکشاف کیا کہ سنٹرل بیورو آف فلم سرٹیفیکیشن (سی بی ایف سی) کئی ماہ سے فلم کی منظوری میں تاخیر کر رہا ہے، جس کی وجہ سے انہیں خدشہ ہے کہ فلم میں کیا کچھ حذف کیا جائے گا یا باقی رکھا جائے گا۔

انہوں نے کہا کہ او ٹی ٹی پلیٹ فارم پر ریلیز سنسر شپ کے مسائل سے بچنے کا بہترین حل ہوتا، اور سنیما ریلیز سے بہتر یہ ہوتا کہ وہ اسے آن لائن ہی ریلیز کردیتی۔

کنگنا نے مزید کہا کہ انہوں نے کچھ معاملات کو معمولی سمجھا، یہ سوچتے ہوئے کہ بھارتیہ جنتا پارٹی کی حکومت کے دور میں فلم کی ریلیز آسان ہوگی۔ تاہم اب انہیں احساس ہو رہا ہے کہ انہوں نے مختلف سطحوں پر غلط فیصلے کیے، جن میں فلم کی ہدایت کاری کرنا بھی شامل ہے۔

اداکارہ نے بتایا کہ وہ مایوس تھیں لیکن حالات کا سامنا کر رہی ہیں۔