news
لاہور: غیرت کے نام پر والدین کا بیٹی پر حملہ
لاہور:
والدین نے غیرت کے نام پر اپنی ہی بیٹی پر گولیاں چلا دیں، جس کے نتیجے میں 20 سالہ شمائلہ شدید زخمی ہو گئی اور اسے اسپتال منتقل کر دیا گیا۔
صوبائی دارالحکومت کے علاقے ہنجروال میں غیرت کے نام پر بیٹی کو قتل کرنے کی کوشش کا ایک واقعہ پیش آیا، جس میں شمائلہ کو شدید زخمی حالت میں طبی امداد کے لیے اسپتال لے جایا گیا ہے۔
پولیس کے مطابق، شمائلہ کو اس کے والد فیاض، والدہ مسرت بی بی اور دو چچاؤں نے مل کر گولیاں مار کر شدید زخمی کیا۔ اس واقعے کا مقدمہ تھانہ ہنجروال کے سب انسپکٹر انتظار حسین کی مدعیت میں درج کیا گیا ہے۔
ایس ایچ او کے مطابق، والد، والدہ اور دونوں چچاؤں کو پولیس نے گرفتار کر لیا ہے اور ملزمان سے پستول بھی برآمد کر لیا گیا ہے۔ ملزمان نے شمائلہ کو پسند کی شادی کرنے پر قتل کرنے کی کوشش کی، جن سے مزید تفتیش کی جا رہی ہے۔