خیبرپختونخوا میں سیکیورٹی فورسز کی کارروائیاں: 19 خوارج ہلاک، 3 جوان شہید

خیبرپختونخوا کے مختلف علاقوں میں سیکیورٹی فورسز کی کارروائیوں کے دوران 19 خوارج ہلاک ہوئے، جبکہ فائرنگ کے تبادلے میں پاک فوج کے 3 جوانوں نے جام شہادت نوش کیا۔ پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق، خوارج کی موجودگی کی خفیہ اطلاع پر سیکیورٹی فورسز نے ضلع پشاور کے علاقے متنی میں آپریشن کیا، جس کے دوران خوارج کے ٹھکانے کو مؤثر طریقے سے نشانہ بنایا گیا۔

آئی ایس پی آر کے مطابق اس کارروائی میں 8 خوارج کو ہلاک کیا گیا، جبکہ خیبرپختونخوا میں مجموعی طور پر تین مختلف کارروائیوں میں 19 خوارج کو جہنم واصل کیا گیا۔ آئی ایس پی آر نے مزید کہا کہ علاقے میں موجود کسی بھی خارجی کو ختم کرنے کے لیے کارروائیاں جاری ہیں۔

آئی ایس پی آر کے مطابق شدید فائرنگ کے تبادلے کے دوران تین بہادر جوانوں نے جام شہادت نوش کیا، جن میں 38 سالہ لانس حوالدار عباس علی، جو گلگت بلتستان کے ضلع غذر سے تعلق رکھتے تھے، 37 سالہ نائیک محمد نذیر، جو ضلع سکردو سے تھے، اور 37 سالہ نائیک محمد عثمان، جو خیبرپختونخوا کے ضلع اٹک کے رہائشی تھے، شامل ہیں۔

آئی ایس پی آر نے یہ بھی بتایا کہ ضلع کرک میں تیسری کارروائی کے دوران سیکیورٹی فورسز نے خوارج کے مقام کو مؤثر انداز سے نشانہ بنایا اور فائرنگ کا تبادلہ کیا۔