drama
گوہر رشید اور کبریٰ خان کی شادی کی افواہیں زور پکڑ گئیں
سوشل میڈیا پر یہ قیاس آرائیاں کی جا رہی ہیں کہ مرزا گوہر رشید اور کبریٰ خان کی شادی کی تیاریاں شروع ہو چکی ہیں۔
یہ افواہیں گوہر رشید کی جانب سے فوٹو اینڈ ویڈیو شیئرنگ ایپ انسٹاگرام پر ایک ویڈیو پوسٹ کرنے کے بعد سامنے آئی ہیں۔
گوہر رشید نے ویڈیو کے کیپشن میں ’بسم اللہ 2025‘ لکھا، جس میں شازیہ وجاہت، وجاہت رؤف، شہزاد شیخ ان کی اہلیہ، کبریٰ خان اور دیگر قریبی دوستوں کو ایک ایونٹ کی تیاری میں مصروف دیکھا جا سکتا ہے۔
یہ ویڈیو سامنے آنے کے بعد دعویٰ کیا جا رہا ہے کہ گوہر اور کبریٰ کی شادی کی تیاریاں کراچی میں جاری ہیں اور گزشتہ رات دونوں اداکاروں کے دوستوں نے ڈانس پریکٹس بھی کی۔ واضح رہے کہ گوہر رشید اور کبریٰ خان کی قریبی دوستی کی وجہ سے انہیں گہرے تعلق میں تصور کیا جاتا ہے، تاہم دونوں نے کبھی اس بات کا باقاعدہ اعلان نہیں کیا۔
چند ماہ قبل، گوہر رشید نے ایک انٹرویو میں سنگل نہ ہونے کا اعتراف کرتے ہوئے کہا تھا کہ وہ کسی کے ساتھ تعلق میں ہیں اور اب ان کے بغیر اپنی زندگی کا تصور نہیں کر سکتے، لیکن اداکار نے اس خاتون کا نام نہیں بتایا تھا۔ گوہر نے مزید کہا کہ ان کے بارے میں اتنی باتیں کی جا سکتی ہیں کہ ایک پورا شو بنایا جا سکے۔