news
وزیراعظم شہباز شریف کا اعتزاز حسن کی شہادت پر بیان، بہادری کی مثال
اسلام آباد:
وزیراعظم شہباز شریف نے کہا ہے کہ ہمت اور بہادری کا ایک عمل کئی زندگیوں کو بچا سکتا ہے۔
وطن کے لیے جان قربان کرنے والے طالب علم اعتزاز حسن کی برسی کے موقع پر اپنے بیان میں وزیراعظم شہباز شریف نے کہا کہ آج ہم خیبرپختونخوا کے ضلع ہنگو کے رہائشی شہید اعتزاز حسن کی شہادت کو یاد کرتے ہوئے افسردہ ہیں، جن کی غیر معمولی جرأت ہمارے لیے اُمید کی کرن ہے۔
شہباز شریف نے کہا کہ صرف 15 سال کی عمر میں اعتزاز نے بے مثال بہادری کا مظاہرہ کیا اور اپنے اسکول اور ہم جماعتوں کو دہشت گرد حملے سے بچاتے ہوئے اپنی جان دی۔
وزیراعظم شہباز شریف نے اپنے بیان میں کہا کہ اعتزاز کا بے لوث اور غیر متزلزل عزم ہمیں یاد دلاتا ہے کہ ہمت اور بہادری کا ایک عمل کئی زندگیوں کو بچا سکتا ہے۔ اعتزاز کی میراث آنے والی نسلوں کے لیے مشعل راہ ہے۔