وزیراعظم کا مہنگائی میں کمی اور معاشی استحکام پر اطمینان کا اظہار

وزیراعظم محمد شہبازشریف نے 81 ماہ بعد مہنگائی کی شرح میں کمی پر اطمینان کا اظہار کیا ہے۔ انہوں نے کہا کہ دسمبر 2024 میں مہنگائی کی شرح 4.1 فیصد پر آنا خوش آئند ہے، اور ہم نے میکرواکنامک استحکام حاصل کر لیا ہے، لیکن یہ صرف آغاز ہے۔ اڑان پاکستان منصوبے کا آغاز کیا گیا ہے، جو پاکستان کو دنیا کے صف اول کے ممالک میں شامل کر دے گا۔ حکومت معاشی اصلاحات کی پالیسی پر گامزن ہے، اور 24 سال بعد کرنٹ اکاؤنٹ سرپلس ہوا ہے۔

افراط زر 38 فیصد سے کم ہو کر 4.1 فیصد پر آ گیا ہے، جبکہ پالیسی ریٹ 22 فیصد سے کم ہو کر 13 فیصد پر آ گیا ہے۔ اسٹاک مارکیٹ دنیا کی دوسری بہترین اسٹاک مارکیٹ بن چکی ہے، اور حکومتی ٹیم کی معاشی اور مالیاتی پالیسی کی بدولت معیشت استحکام کی جانب بڑھ رہی ہے۔ عوام کی مشکلات کا احساس تھا اور ان کے حل کے لیے دن رات کام کیا گیا۔

مزید برآں، وزیراعظم شہباز شریف نے وفاقی کابینہ کے اجلاس سے خطاب کرتے ہوئے کہا کہ نئے سال کے آغاز میں پاکستان کی خوشحالی کے لیے دعاگو ہوں۔ اگر ہم ثابت قدمی اور محنت کے ساتھ اپنے اہداف حاصل کرنے کی کوشش کریں تو اڑان پاکستان نئے سال میں نیک شگون ثابت ہوگا۔

انہوں نے مزید کہا کہ اگر پاکستان کی معاشی ترقی مقصود ہے تو برآمدات پر مبنی ترقی کے سوا ہمارے پاس کوئی آپشن نہیں ہے، اور نمو کے شعبے میں استحکام ضروری ہے۔