news
ہوم گرون معاشی اصلاحات: پاکستان کی ترقی کا نیا ایجنڈا
وفاقی وزیر برائے اطلاعات، نشریات، قومی ورثہ و ثقافت عطاءاللہ تارڑ نے کہا ہے کہ ہوم گرون معاشی اصلاحات کا ایجنڈا ایک اہم اقدام ہے جو پاکستان اور اس کے عوام کی ترقی کے لیے ہے۔ انہوں نے مزید کہا کہ اس ایجنڈے میں عوام کے لیے خوشخبریاں شامل ہوں گی۔ اڑان پاکستان ہوم گرون نیشنل اکنامک پلان 2024/29ء کے حوالے سے میڈیا سے گفتگو کرتے ہوئے انہوں نے بتایا کہ الحمد اللہ پاکستان کے تمام معاشی اعشاریے بہتر ہو چکے ہیں، ملک ڈیفالٹ سے استحکام کی طرف بڑھ رہا ہے اور اب ترقی کی جانب گامزن ہے۔ وزیراعظم شہباز شریف آج ہوم گرون اکنامک ایجنڈے کا اعلان کرنے والے ہیں، جو کہ میڈ ان پاکستان معاشی اصلاحات کا ایجنڈا ہے، جس کے تحت معاشی ترقی کا سفر طے کیا جائے گا اور عوام کو خوشخبریاں ملیں گی۔
انہوں نے یہ بھی کہا کہ عوامی مینڈیٹ کے تحت وفاق میں مخلوط حکومت قائم ہوئی، جہاں تمام سیاسی جماعتوں نے اپنے منشور کے مطابق الیکشن میں حصہ لیا۔ سیاسی جماعتوں نے عوام سے کچھ وعدے کیے تھے، جن میں پنجاب میں مسلم لیگ ن، خیبر پختونخواہ میں تحریک انصاف، اور سندھ و بلوچستان میں پیپلز پارٹی شامل ہیں۔ سیاسی جماعتوں نے عوام کو یقین دلایا کہ ان کے مسائل کا حل ان کے پاس موجود ہے۔