news
یورپ میں تمام ڈیوائسز کے لیے ٹائپ سی چارجر کا قانون نافذ
یورپ میں تمام ڈیوائسز کے لیے صرف ٹائپ سی چارجر کے استعمال کا قانون نافذ ہو چکا ہے۔ عالمی میڈیا کے مطابق، یورپی یونین کی کونسل نے اکتوبر 2022ء میں ایک جیسے چارجر کے اصول کی منظوری دی تھی، جو اب لاگو ہو چکا ہے۔ اس قانون کے تحت اب سے یورپ بھر میں صرف ٹائپ سی چارجر استعمال کیے جائیں گے۔ یہ قوانین موبائل فونز، ٹیبلٹس، ڈیجیٹل کیمرے، ہیڈ فون، ہیڈ سیٹس، ویڈیو گیم کنسولز، پورٹیبل سپیکرز، ای ریڈرز، کی بورڈز، ماؤس، پورٹیبل نیویگیشن سسٹمز اور ایئربڈز پر لاگو ہوں گے، جبکہ 28 اپریل 2026ء سے یہ قانون لیپ ٹاپس پر بھی نافذ ہو جائے گا۔
بتایا گیا ہے کہ الیکٹرانک آلات کے مینوفیکچررز کو اپنی مصنوعات کے ڈیزائن میں تبدیلی کرنے اور تعمیل کو یقینی بنانے کے لیے وقت دیا گیا تھا۔ نئے قانون کے تحت، لوگ اپنے موبائل فون اور دیگر الیکٹرانک آلات کو ایک ہی یو ایس بی چارجر سے چارج کر سکیں گے، جس سے انہیں مختلف چارجرز خریدنے اور رکھنے کی پریشانی سے نجات ملے گی۔ صارفین کو مختلف چارجرز کی غیر ضروری خریداریوں پر سالانہ تقریباً 250 ملین یورو کی بچت میں مدد ملے گی۔
نئے قوانین چارجرز کے دوبارہ استعمال کی بھی حوصلہ افزائی کرتے ہیں، جو ماحولیاتی اثرات کو کم کرنے میں مددگار ثابت ہوتا ہے۔