news
خلا میں دماغی خلیات کی پختگی پر تحقیق، نیورانز میں حیرت انگیز تبدیلی
خلا میں انتہائی کم کشش ثقل کا اثر پٹھوں، ہڈیوں، مدافعتی نظام اور ادراک پر تو دیکھا جا چکا ہے، لیکن دماغ پر اس کے مخصوص اثرات کے بارے میں معلومات ابھی تک کم تھیں۔ اس خلا میں دماغی خلیات آرگنائڈز کے اثرات جانچنے کے لیے سکریپس ریسرچ کے سائنسدانوں نے نیویارک اسٹیم سیل فاؤنڈیشن کے تعاون سے ان خلیات کو خلا میں موجود بین الاقوامی خلائی اسٹیشن (آئی ایس ایس) بھیجا۔
ایک ماہ بعد جب یہ خلیے مدار سے واپس آئے، تو ماہرین کو یہ دیکھ کر حیرانی ہوئی کہ وہ صحت مند تھے اور زمین پر موجود ایک جیسے آرگنائڈز کے مقابلے میں تیزی سے پختہ ہو چکے تھے۔ خلا سے آنے والے آرگنائڈز “بالغ” نیورانز بننے کے قریب تھے اور ان میں مہارت کے آثار بھی ظاہر ہونے لگے تھے۔
یہ نتائج جریدے اسٹیم سیلز ٹرانسلیشنل میڈیسن میں شائع ہوئے ہیں اور یہ خلا میں سفر کے ممکنہ اعصابی اثرات پر روشنی ڈال سکتے ہیں۔ مالیکیولر میڈیسن کے شعبہ میں سینئر مصنف اور پروفیسر جین لورنگ کا کہنا تھا کہ خلا میں ان خلیات کا زندہ رہنا ایک بڑا تعجب تھا، اور یہ خلا میں مستقبل کے تجربات کے لیے بنیاد فراہم کرتا ہے، جن میں دماغ کے دیگر حصوں کو بھی شامل کیا جا سکتا ہے جو ذہنی خرابیوں کی وجہ سے متاثر ہوتے ہیں۔