news
یوٹیوب نے اے آئی ڈبنگ سروس متعارف کرادی، زبانوں کی تعداد میں اضافہ
یوٹیوب نے اپنے ڈیڑھ سال بعد کا وعدہ پورا کرتے ہوئے اے آئی ڈبنگ سروس متعارف کرادی ہے۔ اس نئی سروس کے ذریعے یوٹیوب تخلیق کار اپنی انگریزی ویڈیوز کو مختلف عالمی زبانوں میں ڈب کر سکیں گے۔ یہ فیچر لاکھوں کی تعداد میں معلوماتی اور تعلیمی یوٹیوب چینلز کے لیے دستیاب ہوگا اور اسے وسیع پیمانے پر جلد جاری کر دیا جائے گا۔
تخلیق کار اب اپنی ویڈیوز کو فرانسیسی، جرمن، ہندی، انڈونیشین، اطالوی، جاپانی، پرتگالی اور ہسپانوی زبانوں میں ڈب کر سکیں گے، اور ان زبانوں میں سے کسی ایک زبان کی ویڈیو کی صرف انگریزی ڈبنگ کی جا سکے گی۔ اس عمل کو خودکار طریقے سے انجام دیا جائے گا، اور تخلیق کار ویڈیو لائیو ہونے سے پہلے اس کا پری ویو کر سکیں گے۔
ڈب شدہ ویڈیوز یوٹیوب اسٹوڈیو کے زبانوں کے سیکشن میں دستیاب ہوں گی اور آٹو ڈب کے لیبل کے ساتھ دکھائی دیں گی۔ کمپنی نے اس فیچر کو سمجھانے کے لیے کچھ مثالی ویڈیوز بھی شیئر کی ہیں، جن میں سے دو ویڈیوز کو فرانسیسی اور ہندی سے انگریزی میں ڈب کیا گیا ہے، اور ایک ویڈیو کو انگریزی میں مختلف زبانوں کے آپشنز کے ساتھ آزمایا گیا ہے۔