خیبر پختونخوا حکومت کا لائف انشورنس اسکیم کا آغاز

پشاور حکومت نے آئندہ سال یکم جنوری سے لائف انشورنس اسکیم شروع کرنے کا فیصلہ کیا ہے۔

وزیراعلیٰ خیبر پختونخوا علی امین خان گنڈاپور کی زیر صدارت ایک اہم اجلاس ہوا جس میں موجودہ صوبائی حکومت کے 8 فلیگ شپ منصوبوں پر پیشرفت کا جائزہ بھی لیا گیا اور اجلاس میں یہ فیصلہ بھی کیا گیا کہ آئندہ سال یکم جنوری سے لائف انشورنس اسیکم شروع کی جائے گی۔
کے پی کے عوام کو لائف انشورنس فراہم کرنے کا انقلابی منصوبہ منظور کر لیا گیا ہے
انشورنس اسکیم کے تحت سرکاری اسپتال یا صحت کارڈ پینل پر موجود اسپتال کے اندر خاندان کے سربراہ کے انتقال کی صورت میں رقم دی جائے گی، 60 سال تک کی عمر کے شخص کے انتقال کرنے کی صورت میں 10 لاکھ روپے اور 60 سال سے زائد عمر کے شخص کی وفات کی صورت میں 5 لاکھ روپے ادا کیے جائیں گے۔
اس انشورنس اسکیم کے تحت شہریوں کی لائف انشورنس پر سالانہ کے حساب سے 4.5 ارب روپے کی لاگت آئے گی جو صوبائی حکومت ہی ادا کرے گی۔
وزیر اعلیٰ نے صوبائی اسلامک تکافل انشورنس کمپنی کے قیام کے لیے 3 ماہ کی ڈیڈ لائن بھی مقرر کردی ہے جب کہ صوبائی حکومت کی اپنی ٹرانسمیشن لائن کے لاٹ 1 کو ہر صورت مقررہ ٹائم لائن کے مطابق ہی مکمل کرنے کی ہدایت کی گئی ہے۔
نیز وزیر اعلیٰ نے محکمہ خزانہ کو پشاور ڈی آئی خان موٹر وے کے لیے بھی 2 ارب روپے جاری کرنے کی ہدایت کردی ہے۔