غیر قانونی ذرائع سے اربوں ڈالر کمانے والا پائریسی گروپ گرفتار

یورپ میں 10 اہم ممالک کی پولیس نے ایک بڑے مشترکہ آپریشن میں دنیا کے سب سے بڑے پائریسی نیٹ ورک کو پکڑ لیا ہے۔

غیر ملکی خبر رساں ادارے کے مطابق اس آپریشن ٹیکن ڈاؤن میں برطانیہ، بلغاریہ، کروشیا، فرانس، جرمنی، اٹلی، نیدرلینڈز، سوئیڈن، سوئٹزرلینڈ اور رومانیا کے قانون نافذ کرنے والے اداروں نے بھر پور حصہ لیا۔

یہ سب سے بڑا پائریسی نیٹ ورک مبینہ طور پر یورپ میں 2 کروڑ 20 لاکھ سے زائد صارفین کو پائریٹڈ کانٹینٹ فراہم کر رہا تھا اور غیر قانونی طور پر 26 کروڑ ڈالر سے زائد ماہانہ اور سالانہ 3.15 ارب ڈالر کما رہا تھا۔ اس وجہ سے اسٹریمنگ سروسز کو سالانہ 10 ارب ڈالر تک کا نقصان ہو رہا تھا۔

آڈیو ویژول اینٹی پائریسی ایلائنس (اے اے پی اے) کی مدد سے قانون نافذ کرنے والے اداروں نے اس آپریشن میں 17 لاکھ 30 ہزار ڈالر کی کرپٹو کرنسی ضبط کی اور 11 افراد کو حراست میں بھی لے لیا ، جبکہ 102 افراد ابھی زیرِ تفتیش ہیں۔

اے اے پی اے کے شریک صدر مارک ملریڈی نے کہا کہ اس پیمانے پر کیے جانے والے ملٹی جیورِسڈکشنل لا انفورسمنٹ ایکشنز اس چیلنج کو نمایاں کرتے ہیں جس کا سامنا اس انڈسٹری کو پیچیدہ بین الاقوامی پائریٹ نیٹورکس کی وجہ سے کرنا پڑتا ہے۔

اس آپریشن سے دو سال قبل تک تحقیقات کی گئیں جس میں یورو پول بھی شامل تھی۔ ان تحقیقات میں سوشل میڈیا پلیٹ فارم اور غیر قانونی اسٹریمنگ فورمز کو بھی زیر نگرانی رکھا گیا۔

یورو پول نے ایک پریس ریلیز میں کہا کہ کاپی رائٹ خلاف ورزی سے ہٹ کر بھی اس معاملے میں دیگر مجرمانہ سرگرمیوں کے شواہد ملے ہیں جس میں منی لانڈرنگ اور سائبر کرائم وغیرہ شامل ہیں۔

آپریشن کے دوران 29 کمپیوٹر سرور اور سینکڑوں آئی پی ٹی وی ڈیوائس کو بھی قبضے میں لے لیا گیا۔