دفاعی نمائش آئیڈیاز:55 ممالک کے 330 سے زائد وفود کو دعوت

ایکسپو سینٹر کراچی میں دفاعی نمائش آئیڈیاز کے بارہویں ایڈیشن کے لیے 55 ممالک کے 330 سے زیادہ وفود کو مدعو کیا گیا ہے
کراچی میں منعقد ہونے والی اس 4 روزہ نمائش کے حوالے سے ڈائریکٹر کوآرڈی نیشن ڈیپو بریگیڈیئر علی عادل اور ڈائریکٹر میڈیا ڈیپو کموڈور اعتزاز خالد نے میڈیا کو بریفنگ دی
بریفنگ کے اس موقع پر کموڈور اعتزاز خالد نے کہا کہ پاکستان دفاعی مصنوعات تیار کر رہا ہے اس نمائش میں ملک میں تیار کی گئی دفاعی مصنوعات پیش کی جائیں گی
انہوں نے کہا کہ 55 ممالک کے 330 سے زیادہ وفود آئیڈیاز 2024ء کی اس نمائش میں مدعو کیے گئے ہیں، وزیرِ اعظم پاکستان اس دفاعی نمائش کی افتتاحی تقریب کے مہمانِ خصوصی ہوں گے
آئیڈیاز 2024ء کراچی میں 19 سے 22 نومبر تک جاری رہے گی
دوسری طرف ڈی آئی جی ٹریفک کا کہنا ہے کہ نمائش کے دنوں میں ٹریفک کے لیے خصو صی پلان ترتیب دیا گیا ہے
ان کا کہنا ہے کہ آئیڈیاز 2024 کے دوران سر شاہ سلیمان روڈ حسن اسکوائر سے اسٹیدیم تک صبح 7 سے شام 7 بجے تک بند رہا کرے گی،تاہم شام 7 بجے کے بعد روڈ کھول دی جائے گی
واضح رہے کہ کراچی ایکسپو سینٹر میں 19 سے 22 نومبر تک دفاعی نمائش آئیڈیاز کا انعقاد کیا جائے گا
آئیڈیاز 2024ء کی 4 روزہ نمائش میں متعدد سرگرمیاں شامل ہوں گی، جس میں افتتاحی تقریب، دفاعی صنعتوں پر سیمینار اور میٹنگز منعقد کی جائیں گی
اس نمائش میں دنیا بھر سے نمائشی ممالک بھی اپنی دفاعی مصنوعات کا سازو سامان پیش کریں گے
علاوہ ازیں نشان پاکستان سی ویو پر کراچی شو بھی منعقد کیا جائے گا