news
عدنان صدیقی کی بکنگھم پیلس میں بادشاہ چارلس سوم سے ملاقات
پاکستان شوبز انڈسٹری کے معروف اداکار عدنان صدیقی کو برطانوی بادشاہ چارلس سوم سے ملاقات کا شرف حاصل ہوا۔ یہ ملاقات بکنگھم پیلس میں ہوئی، جس کے بارے میں عدنان صدیقی نے سوشل میڈیا پر اپنے مداحوں کو آگاہ کیا۔ اداکار نے اپنی انسٹاگرام پوسٹ میں اس ملاقات کو مختصر لیکن یادگار قرار دیا اور کہا کہ شاہ چارلس سوم میں لوگوں کو پُرسکون رکھنے کی ایک خاص صلاحیت تھی۔ انہوں نے اس مختصر ملاقات کو اپنی زندگی کا ایک اہم تجربہ قرار دیا۔
عدنان صدیقی نے اس موقع پر شاہ چارلس کی جانب سے موصول ہونے والے دعوت نامے کی تصویر بھی شیئر کی، جس کے مطابق 13 نومبر 2024 کو بکنگھم پیلس میں ایک استقبالیہ تقریب کا انعقاد کیا گیا تھا جس میں فلم اور ٹی وی انڈسٹری کی نمایاں شخصیات کی خدمات کا اعتراف کیا گیا تھا۔ عدنان صدیقی کو بھی اس تقریب میں مدعو کیا گیا تھا۔
عدنان صدیقی کی اداکاری کا آغاز 1994 میں پی ٹی وی کے ڈرامے “عروسہ” سے ہوا تھا، اور اس کے بعد انہوں نے لالی ووڈ، بالی ووڈ اور ہالی ووڈ میں بھی اپنی اداکاری کا لوہا منوایا۔