سموگ کرونا کی طرح سرحدوں سے آرہی ہے، مریم اورنگزیب 

صوبہ پنجاب میں سموگ کے باعث چند مخصوص اضلاع میں ہائیر سیکنڈری تک آن لائن کلاسز کا اعلان کردیا گیا ہے لاہور میں پریس کانفرنس سے خطاب کرتے ہوئے سینئر صوبائی وزیر مریم اورنگزیب نے کہا کہ پرائمری تک جو سکول بند تھے ان کی بندش کا دورانیہ بڑھا دیا گیا ہےاور اس کے ساتھ اب ہم ہائیر سیکنڈری کلاسز تک سکولز بند کر رہے ہیں البتہ چھٹیاں نہیں ہوں گی بلکہ کلاسز آن لائین ہوں گی، طالب علموں کو آن لائن سٹڈی کی طرف لے جائیں گے، 17 نومبر تک لاہور، گوجرانولہ، فیصل آباد اور ملتان ڈویژن میں آن لائن کلاسز ہوں گی، اسی طرح سرکاری اور نجی دفاتر میں 50 فیصد افسران کام کریں گے، سرکاری دفاتر میں زوم میٹنگز ہوں گی نیز ماسک کا استعمال ہر سطح پر ضروری کردیا گیا ہے۔
انہوں نے کہا کہ فصلوں کی باقیاتِ کے جلانے سے سموگ میں اضافہ ہو رہا ہے، پلاسٹک بیگز پر پابندی کے باوجود خلاف ورزی کی جا رہی ہے، اگر آپ نے ماسک کا استعمال نہیں کیا تو آپ میتھین اپنے پھپڑوں میں لے جا رہے ہیں آئندہ 10 دن تک سموگ کی شدت یونہی برقرار رہے گی، سموگ کے خاتمے کے لیے تمام محکمے سر گرم عمل ہیں، ایئر کوالٹی انڈیکس کی مانیٹرنگ کے لیے جدید آلات سے آرستہ کنٹرول روم بنایا گیا ہے۔
سینئر صوبائی وزیر کا کہنا تھا کہ بھارت کی طرف سے ہوا پاکستان میں آئی اور اس سے سموگ میں مزید اضافہ ہوا، بھارت میں فصلوں کی باقیات جلانے اور دھویں کے باعث فضائی آلودگی میں اضافہ ہوا، بھارت کی طرف سے پاکستان آنے والی ہوا میں سموگ بہت تیز تھی، بھارت سے آنے والی سموگ یک دم پھیل گئی ، بھارت کی طرف سے آنے والی ہواؤں سے سب سے زیادہ لاہور متاثر ہوا اور یہ مسئلہ بھارت سے بات کیے بغیر حل نہیں ہو سکتا، بھارت سے بات کر کے ہی یہ معاملہ درست کیا جا سکتا ہے۔
مریم اورنگ زیب نے مزید کہا کہ سموگ کورونا کی طرح سرحدوں سے آرہی ہے، لاہور کا ایئر کوالٹی انڈیکس ایک ہزار سے بھی تجاوز کر گیا ہے،سموگ کے تدارک کے لیے حکومت پنجاب کی طرف سے اقدامات کیے گئے ہیں، 8 ماہ کے عرصہ میں پہلی بار پنجاب حکومت نے تمام محکموں کو بٹھا کر لائحہ عمل پیش کیا ہے سموگ سے بچاؤ کے لیے حکومتی پلان پر سختی سے عملدرآمد کرایا جارہا ہے، 550 سے زائد بھٹوں کو مسمار کر دیا گیا ہے، پلاسٹک بیگز پر پابندی بھی لگا دی گئی ہے عوام کو چاہے کہ سموگ کی صورتحال سے نمٹنے کے لیے احتیاطی تدبیر اختیار کریں، حکومتی ٹیمیں فیلڈ میں ہیں اور صورتحال کو دیکھ رہی ہیں، سموگ ایس او پیز کی خلاف ورزی پر گرفتاریاں بھی ہو رہی ہیں، سموگ کی احتیاتی تدابیر کی خلاف ورزی پر کوئی رعایت نہیں کی جائےگی۔