لاہور چیمبر آف کامرس اینڈ انڈسٹریز کے انتخابات

لاہور چیمبر آف کامرس اینڈ انڈسٹری کے انتخابات 2024-26 کےلئے کارپوریٹ کلاس کے انتخابات گزشتہ روز ہوئے۔ تاریخ میں پہلی مرتبہ ایسا ہوا ہے کہ ٹرن آؤٹ 60 فیصد کے قریب رہا ہے۔کل 4015 میں سے 2600 ووٹرز نے حق رائے دہی استعمال کیا۔ کارپوریٹ کلاس کی 15 نشستوں کے لئے 30 امیدوار مدمقابل تھے جن میں پیاف فاؤنڈر اور بزنس مین پینل کے 15 جبکہ پیاف میاں انجم نثار، لائنیر بزنس گروپ اور پروگریسیو پینل کی طرف سے 15 امیدواروں نے انتخابات میں حصہ لیا۔ 22 سال بعد پیاف فاؤنڈر الائنس ٹوٹنے کے باعث لاہور چیمبر کے الیکشن میں زبردست مقابلہ ہوا ہے۔ دن بھر مختلف کاروباری شخصیات کے درمیان جھڑپوں کا سلسلہ بھی جاری رہا، دھکم پیل کھینچا کھانچی بھی ہوئی تاہم کوئی بڑا جھگڑا رونما نہیں ہوا۔ پنجاب پولیس کی بھاری نفری نے حالات کو قابو میں رکھا۔ انتخابات کے لئے تین رکنی الیکشن ممبران کا پینل بنایا گیا تھا جس میں سابق صدر الماس حیدر، نصر اللہ مغل اور شہزاد عالم خاں شامل تھے۔
1416 ووٹ لے کر تنویر احمد پہلے نمبر پر،لاہور چمبر آف کامرس کارپوریٹ کلاس 15 سیٹوں کے انتخابات میں پیاف پائینر پروگریسیو الائنس میاں انجم نثار گروپ کلین سویپ کر گیا۔ 1416ووٹ لے کر تنویر احمد پہلے، 1398 ووٹ لے کر محمد منیب منوں دوسرے اور 1387 ووٹ لے کر آصف ملک تیسرے نمبر پر رہے۔ خالد عثمان 1380, احتشام الحق 1367، سید حسن رضا 1355, آصف خان 1351, وقاص اسلم 1347, عرفان احمد قریشی 1346, عبدالمجید 1343, افتخار احمد 1340, عامر سعید میاں 1331, منظور حسین 1285، شعبان اختر 1275, سید سلمان علی 1271 ووٹ حاصل کرنے میں کامیاب ہوئے۔
کارپوریٹ کلاس کے نتائج کے اعلان کے بعد آج ایسوسی ایٹ کلاس کا انتخاب ہو گا جس میں دونوں گروپوں کی جانب سے 15-15 امیدوار میدان میں ہیں جبکہ پولنگ کا وقت صبح 9 بجے سے شروع ہو گا جو شام 8 بجے تک جاری رہے گا۔ انتخابات کے موقع پر گفتگو کرتے ہوئے پیاف کے قائد انجم نثار نے بتایا کہ بھر پور الیکشن لڑ رہے ہیں۔ ہمارے گروپ نے ہمیشہ تاجروں کی خدمت کی ہے۔ کامیابی ہماری ہو گی۔ فاؤنڈر گروپ کے رہنما عزیز الرحمن بن نے بتایا کہ جیت اسی کی ہو گی جس نے تاجروں کی خدمت کی ہے۔ پیاف فاؤنڈر الائنس کامیاب ہو گا۔ لاہور چیمبر کے سابق صدر عبدالباسط نے کہا کہ الیکشن ایک فیسٹول ہے جس کو سب کو انجوائے کرنا چاہیے۔ سارے تاجر اور صنعتکار بڑھ چڑھ کر الیکشن کے عمل میں حصہ لے رہے ہیں۔ نتائج کا انتظار کرنا ہو گا۔ مال روڈ کے صدر سہیل بٹ نے بتایا کہ اس بار ٹرن آؤٹ اچھا رہنے کا امکان ہے۔ تاجر کمیونٹی کے لئے چیمبر الیکشن ایک بڑا فیسٹیول ہوتا ہے، تاہم انجم نثار گروپ کی خدمات زیادہ ہیں۔