news
پاکستان کا اقوام متحدہ کی جنرل اسمبلی سے فلسطین کی حمایت کا مطالبہ
پاکستان نے اقوام متحدہ کے رکن ممالک پر زور دیا ہے کہ وہ فلسطین کے حق خودارادیت کو فروغ دیں اور مقبوضہ علاقوں کی حیثیت میں کسی بھی تبدیلی کو تسلیم کرنے سے انکار کریں۔
اقوام متحدہ میں پاکستان کے مستقل مندوب منیر اکرم نے فلسطین کی صورتحال پر اقوام متحدہ کی جنرل اسمبلی کے 10 ویں ہنگامی خصوصی اجلاس سے خطاب کرتے ہوئے فلسطینی عوام کے ساتھ دیرینہ ناانصافیوں کے ازالے کے لیے فوری اور فیصلہ کن اقدامات کا مطالبہ کیا۔
منیر نے فلسطینی ریاست کو اقوام متحدہ کا مکمل رکن تسلیم کرنے اور دو ریاستی حل کو آگے بڑھانے کے لئے فلسطین پر بین الاقوامی کانفرنس بلانے کی ضرورت پر روشنی ڈالی۔
سفیر منیر اکرم نے فلسطین کی جدوجہد آزادی کی حمایت کے لیے پاکستان کے غیر متزلزل عزم کا اعادہ کیا جس کی جڑیں حق خودارادیت کے ذریعے آزادی کے حصول کی اپنی تاریخ پر مبنی ہیں۔
پاک افغان صورتحال کے حوالے سے اسمبلی سے خطاب کرتے ہوئے منیر نے کہا کہ فتنہ الخوارج کو افغان عبوری حکومت کی سرپرستی حاصل ہے ۔ ان کا کہنا تھا کہ پاکستان فتنہ خوارج کے خلاف قومی سطح پر کاروائی کرتا رہے گا نیز پاکستان علاقے اور بین الاقوامی تنظیموں کے ساتھ تعاون کرنے کے لیے بھی تیار ہے تاکہ ٹی ٹی پی کے خطرے کو ختم کیا جا سکے۔