عوام خدمت کی سیاست کرنے والوں کو کامیاب کروائیں، ہمایوں اختر

فیصل آباد (نمائندہ جنگ) استحکام پاکستان پارٹی كکے سینئر نائب صدر اور قومی اسمبلی کے حلقہ این اے97 سے امیدوار ہمایوں اختر خان اور ان کے بیٹے قاسم اختر خان کی طرف سے انتخابی مہم کے دوران حلقے کے مختلف علاقوں میں کارنر میٹنگز سے خطاب کرنے کے علاوہ عمائدین علاقہ اور ووٹرز سے گھر گھر جا کر ملاقاتیں کرنے کا سلسلہ جاری ہے۔ پی پی 102 سے امیدوار سکندر حیات جتوئی اور پی پی 103 سے امیدوار رانا نعیم اقبال بھی ان کے ہمراہ تھے۔ چک 622 گ،ب موضع شیرازہ میں آمد پر اہل علاقہ نے ہمایوں اختر خان کا پرجوش استقبال کیا۔ اس موقع پر لشکر علی گڑگور، میاں ریاض احمد اور دیگر معززین کی قیادت میں تمام برادریوں نے ان کی حمایت کا اعلان کیا۔ دریں اثناء ہمایوں اختر نے دربار قادر بخش شریف کمالیہ پر حاضری دی اور سجادہ نشین صاحبزادہ سید محمد شیراز قادری کے کزن محمد نیاز شاہ سےملاقات کی۔ قاسم اختر خان نے چک 542 میں اہل علاقہ سے ملاقات میں گفتگو کرتے ہوئے کہا کہ این اے 97 کی پسماندگی کی وجہ یہ ہے کہ یہاں کئی دہائیوں سے ایک ہی خاندان سے تعلق رکھنے والے امیدوار پارٹیاں بدل بدل کر اقتدار حاصل کرتے رہے ہیں۔ انہوں نے کہا کہ اس دفعہ بھی تینوں سیاسی جماعتوں نے ایک ہی خاندان کو ٹکٹ جاری کئے ہیں اس لئے حلقہ کی عوام کو چاہیے برادری کی بجائے خدمت کی سیاست کرنے والوں کو کامیاب کروائیں۔