مرکزی رہنماء پی ایم ایل این میاں جاوید لطیف نے کہا ہے کہ پی ٹی آئی مذاکراتی کمیٹی کی ایک ہی ڈیمانڈ ہے کہ عمران خان کو جیل سے باہر نکالا جائے۔ انہوں نے اے آروائی نیوز کے پروگرام میں گفتگو کرتے ہوئے کہا کہ عالمی قوتوں کا حکومت پر دباؤ ہے، اور عالمی اسٹیبلشمنٹ کا کسی شخص کے حق میں کھڑا ہونا بغیر کسی مفاد کے نہیں ہوتا۔ لطیف نے مزید کہا کہ مذاکرات سے پہلے کچھ اقدامات کیے جاتے ہیں جو سنجیدگی کا اظہار کرتے ہیں۔ انہوں نے سوال اٹھایا کہ پی ٹی آئی کی مذاکراتی کمیٹی کس حد تک بااختیار ہے، اور یہ بھی کہ پی ٹی آئی کی عسکری کمیٹی، جس میں گنڈاپور شامل ہیں، اور سیاسی کمیٹی میں کون زیادہ بااختیار ہے؟ انہوں نے یاد دلایا کہ ن لیگ اور پیپلزپارٹی نے میثاق جمہوریت کرنے سے پہلے قوم سے معافی مانگی تھی۔ مذاکرات ہونا اچھی بات ہے، لیکن اس کے کچھ اصول ہوتے ہیں۔ کیا پی ٹی آئی نے یہ تسلیم کر لیا ہے کہ جو مذاکرات کر رہے ہیں وہ کرپٹ نہیں ہیں؟ 9 مئی کے واقعات میں ملوث ورکرز کو سزائیں ملنا شروع ہوگئی ہیں، لیکن ماسٹر مائنڈ اور منصوبہ ساز بڑے لوگ ہیں، اور ان کے لیے مذاکرات کا آغاز ہو چکا ہے۔