19 مئی 2025 کو بھارتی میڈیا میں یہ خبریں پھیلنے لگیں کہ بھارت نے پاکستان کے ساتھ جاری کشیدگی کی وجہ سے اس سال ہونے والے ایشیا کپ اور ویمن ایمرجنگ ایشیا کپ میں شرکت نہ کرنے کا فیصلہ کیا ہے۔ لیکن ان خبروں کے بعد بھارتی کرکٹ بورڈ (بی سی سی آئی) کے سیکرٹری دیو اجیت سائکیا نے ان رپورٹس کی سختی سے تردید کی ہے۔ ان کا کہنا ہے کہ ایشین کرکٹ کونسل (ACC) کے کسی ایونٹ سے بھارت کی دستبرداری کا کوئی فیصلہ نہیں ہوا اور نہ ہی اس پر کوئی باضابطہ بات چیت کی گئی ہے۔

اجیت سائکیا نے واضح کیا کہ ان خبروں میں کوئی حقیقت نہیں اور یہ صرف قیاس آرائیاں ہیں۔ انہوں نے مزید کہا کہ اس وقت بورڈ کی تمام توجہ آئی پی ایل اور انگلینڈ کے خلاف آنے والی سیریز پر مرکوز ہے۔ جب بھی اے سی سی ایونٹس کے بارے میں کوئی فیصلہ ہوگا، بی سی سی آئی خود باضابطہ طور پر اس کا اعلان کرے گا۔

یہ بات بھی قابل ذکر ہے کہ بھارتی میڈیا کے ایک معروف اخبار نے نامعلوم ذرائع کے حوالے سے بھارت کے ایشیا کپ اور ویمن ایمرجنگ ایشیا کپ سے دستبردار ہونے کی خبر دی تھی، جس پر اب بورڈ نے باضابطہ وضاحت جاری کر دی ہے۔

راولپنڈی: پاک بھارت کشیدہ حالات کے پیش نظر پاکستان سپر لیگ (پی ایس ایل) 2025 کے 10ویں ایڈیشن کا آج راولپنڈی میں کھیلا جانے والا میچ منسوخ کر دیا گیا ہے۔ منسوخ ہونے والا میچ کراچی کنگز اور پشاور زلمی کے درمیان ہونا تھا۔

ذرائع کے مطابق موجودہ سیکیورٹی صورتحال، فضائی حدود کی بندش اور داخلی سلامتی کے خدشات کے باعث پاکستان کرکٹ بورڈ (پی سی بی)، وزیر داخلہ محسن نقوی اور پی ایس ایل کے دیگر اسٹیک ہولڈرز کے درمیان اہم اجلاس جاری ہے، جس میں ٹورنامنٹ کے باقی میچز سے متعلق فیصلہ کیا جا رہا ہے۔

پی ایس ایل کے پلے آف مرحلے سے قبل چار لیگ میچز باقی ہیں، جن کے انعقاد پر بھی غیر یقینی صورتحال چھا گئی ہے۔ حکام کے مطابق اگر بین الاقوامی سطح پر میچز کی منتقلی ممکن نہ ہو سکی تو باقی تمام مقابلے کراچی میں کرائے جا سکتے ہیں۔ دبئی یا دوحا منتقلی پر بھی غور جاری ہے۔

فیصلہ آج شام تک متوقع ہے، جب کہ شائقین کرکٹ کو ہدایت کی گئی ہے کہ وہ پی سی بی کی جانب سے جاری ہونے والی تازہ اطلاعات پر نظر رکھیں۔