پاکستانی شوبز انڈسٹری کی اُبھرتی ہوئی اداکارہ سکینہ خان نے ایک نجی ٹی وی پروگرام میں اپنی ذاتی زندگی کے حساس پہلو پر بات کی، جہاں وہ اپنی حالیہ ناکام محبت کا ذکر کرتے ہوئے جذباتی ہوگئیں۔ میزبان عمران اشرف کے سوال پر سکینہ خان نے بتایا کہ وہ حال ہی میں ایک گہری محبت میں ناکامی کا سامنا کر چکی ہیں۔ اُن کا کہنا تھا کہ انہیں اپنی محبت سے بہت سی امیدیں تھیں جو پوری نہ ہو سکیں، اور یہ ٹوٹنے والی امیدیں اُن کے لیے سب سے زیادہ تکلیف دہ تھیں۔
سکینہ نے مزید کہا کہ جب کسی پر یقین ٹوٹتا ہے تو انسان کے اندر ایک گہرا خلا پیدا ہوتا ہے، لیکن اسی تکلیف میں ایک عجیب سا سکون بھی چھپا ہوتا ہے۔ اُن کا کہنا تھا کہ وہ اب بھی اس محبت کے واپس آنے کی امید رکھتی ہیں، اور اس مسلسل انتظار نے انہیں اندر سے توڑ دیا ہے۔ اداکارہ نے دعا کی کہ انہیں صبر نہ آئے، کیونکہ اگر صبر آ گیا اور محبت واپس آئی، تو وہ اُسے قبول نہیں کر سکیں گی۔

دنیا کے امیر ترین شخص ایلون مسک کی بیٹی ویوین جینا ولسن نے فیشن انڈسٹری میں قدم رکھ دیا ہے۔ 21 سالہ ویوین نے 15 مئی کو مشہور فیشن برانڈ ’وائلڈ فینگ‘ کی نئی مہم کا حصہ بن کر اپنے ماڈلنگ کیریئر کا آغاز کیا۔ یہ مہم شناخت، خود اعتمادی اور خود اظہار کے موضوعات پر مبنی ہے۔ ویوین نے اس مہم کی تصاویر اور ویڈیوز انسٹاگرام پر شیئر کیں جن میں وہ مختلف ملبوسات میں پراعتماد انداز میں جلوہ گر ہوئیں۔
ویوین نہ صرف اس مہم کا چہرہ ہیں بلکہ انہوں نے اس کے لیے ایک خصوصی ٹی شرٹ بھی ڈیزائن کی ہے، جس کی تمام آمدنی “دی ٹریور پراجیکٹ” کو دی جائے گی، جو LGBTQ+ نوجوانوں کی مدد کرتا ہے۔ وائلڈ فینگ کی سی ای او ایما میکلروئے نے ویوین کو بہادری، ذہانت اور بے باکی کی علامت قرار دیا۔ یاد رہے کہ ویوین نے 2022 میں اپنا نام اور جنس قانونی طور پر تبدیل کروانے کے لیے درخواست دی تھی، جس پر وہ میڈیا کی توجہ کا مرکز بنی تھیں۔