سپریم کورٹ آف پاکستان کے سینئر جج جسٹس منصور علی شاہ نے چیف جسٹس یحییٰ آفریدی کو 26ویں آئینی ترمیم کے خلاف درخواستیں فل کورٹ کے سامنے پیش کرنے کیلئے خط لکھ دیا ہے، سندھ ہائیکورٹ اور پشاور ہائیکورٹ کے لیے ایڈیشنل ججوں کی نامزدگیوں پر بھی تحفظات کا اظہار کردیا گیا ہے۔
تفصیلات کے مطابق جسٹس منصور علی شاہ نے 26ویں آئینی ترمیم کے خلاف درخواستوں پر سپریم کورٹ کا فُل کورٹ بنچ تشکیل دینے کیلئے چیف جسٹس یحییٰ آفریدی کو ایک خط ارسال کیا ہے، جس میں انہوں نے 6 دسمبر کو شیڈول جوڈیشل کمیشن کا اجلاس ملتوی کرنے کی بھی استدعا کی ہے۔
جسٹس منصور علی شاہ نے جسٹس یحییٰ آفریدی کے نام اپنےخط میں کہا ہے کہ 26 ویں آئینی ترمیم پر تقریباً دو درجن درخواستیں اس وقت سپریم کورٹ کے اندر زیر سماعت ہیں، چیف جسٹس 26 ویں آئینی ترمیم کیخلاف درخواستوں پر سماعت کیلئے فل کورٹ تشکیل دے دیں، موجودہ جوڈیشل کمیشن 26 ویں آئینی ترمیم کے تحت ہی بنایا گیا ہے، جس کی آئینی حیثیت سپریم کورٹ میں مختلف درخواست گزاروں نے چیلنج کر دی ہے، 26 ویں ترمیم کیخلاف درخواستوں پر فیصلے سے پہلے جوڈیشل کمیشن کی قانونی حیثیت بھی مشکوک ہے۔
سپریم کورٹ کے سینئر ترین جج کا یہ مؤقف ہے کہ اگر 26 ویں آئینی ترمیم کالعدم قرار دے دی گئی تو کمیشن کے تحت ہونے والے تمام فیصلے اور ججز کی تقرریاں بھی غیر مؤثر ہو جائیں گی، جسٹس منیب اختر اور میں نے 31 اکتوبر 2024ء کو فل کورٹ میں ان درخواستوں کو سماعت کے لیے مقرر کرنے کا فیصلہ کیا تھا لیکن ابھی تک ان درخواستوں کی سماعت مقرر نہیں کی گئی اور رجسٹرار کی طرف سے کوئی جواب موصول نہیں ہوا، جب تک ان آئینی معاملات کا حتمی فیصلہ نہیں ہو جاتا، اس وقت تک کے لیے جوڈیشل کمیشن کے اجلاس کو ملتوی کر دیا جائے۔

توشہ خانہ 2 کیس میں بانی پی ٹی آئی کی اہلیہ بشریٰ بی بی کے وارنٹ گرفتاری جاری کر دئیے گئے ہیں ،عدالت نے مسلسل غیر حاضری کے باعث بشریٰ بی بی کے وارنٹ گرفتاری جاری کر دئیے ہیں،عدالت نے بشریٰ بی بی کی حاضری سے استثنیٰ کی درخواست بھی مسترد کردی تھی،راولپنڈی کی اڈیالہ جیل میں توشہ خانہ 2کیس کی سماعت ہوئی ، جس میں اسپیشل جج سینٹرل شاہ رخ ارجمند کی عدالت میں بشریٰ بی بی آج بھی پیش نہ ہوئیں،عدالت کی طرف سے بشریٰ بی بی کے ضامن کو بھی نوٹس جاری کر دیا گیا کہ آپ کے شورٹی بانڈز کیوں ضبط نہ کئے جائیں۔
واضح رہے کہ اس سے قبل بھی 190 ملین پاونڈ ریفرنس میں عدالت نے بشری بی بی کے ناقابل ضمانت وارنٹ قائم رکھتے ہوئے ضمانتی کو دوبارہ سے نوٹس جاری کر دیئے گئے تھے جبکہ عدالت میں وکیل نے آئندہ ہونے والی پیشی پر بشریٰ بی بی کی حاضری کیلئے انڈرٹیکنگ بھی عدالت میں جمع کروائی گئی تھی ۔

راولپنڈی کی اڈیالہ جیل میں احتساب عدالت نے عمران خان اور بشری بی بی کے خلاف 190 ملین پاونڈ ریفرنس کی سماعت بھی کی تھی۔

اس موقع پر عمران خان کو عدالت میں بھی پیش کیا گیا تھا تاہم بشریٰ بی بی عدالت میں پیش نہ ہوئیں تھیں۔دوران سماعت وکیل صفائی سلمان صفدر نے عدالت میں فیصلہ کن انڈر ٹیکنگ جمع کروانے کے ساتھ عدالت کو یقین دہانی کروائی تھی کہ بشریٰ بی بی آئندہ سماعت پر ہر صورت عدالت میں حاضر ہوں گی۔عدالت صرف 3 تاریخوں کا ہی موقع دے دے اور وہ3 تاریخوں میں ملزمان کے 342 کے بیان بھی جمع کروا دیں گے۔
نیب وکلا ء نے نہ تو یقین دہانی کی مخالفت کی اور نہ ہی نیب وکلاءنے انڈرٹیکنگ کی مخالفت کی تھی۔عدالت میں بشریٰ بی بی کی حاضری سے استثنیٰ کی درخواست بھی دائر کی گئی تھی۔ جس پر نیب کے وکلا نے اعتراضات بھی اٹھائے تھے۔دوران سماعت وکیل سلمان صفدر کا بیان تھا کہ بشریٰ بی بی کے پلیڈر بھی جیل کے باہر ہی موجود ہیں جس پر پراسیکیوٹر جنرل نیب نے یہ کہا تھاکہ بشریٰ بی بی عدالت آکر ہی اپنا پلیڈر مقرر کر سکتی ہیں۔
پراسیکیوٹر جنرل نیب سردار مظفر عباسی کا کہنا تھاکہ پراسیکیوشن بھی کوئی جلد بازی نہیں چاہتی البتہ عدالت کو اس بات کو بھی دیکھنا ہے کہ اس کیس کو ایک سال مکمل ہو چکا تھا۔ وکلا صفائی کو 342 کے بیان کیلئے 8 مواقع بھی مل چکے ہیں اور اس سے قبل کیس کے تفتیشی افسر پر جرح کیلئے وکلا صفائی کو 38 مواقع بھی فراہم کئے گئے تھے۔نیب نے بشریٰ بی بی کے ناقابل ضمانت وارنٹ گرفتاری پر عملدرآمد کی رپوٹ بھی عدالت میں پیش کردی تھی۔
عدالت کو بتایا گیا کہ نیب نے بہت کوشش کی لیکن بشریٰ بی بی اپنے پتہ پر موجود نہیں تھیں۔بعدازاں عدالت نے بشریٰ بی بی کے ناقابل ضمانت وارنٹ گرفتاری برقرار رکھتے ہوئے ان کے ضامن کو بھی شوکاز نوٹس جاری کردیا جبکہ کیس کی مزید سماعت 5 دسمبر تک کے لیے ملتوی کردی گئی تھی۔