وفاقی وزیر برائے ریلوے حنیف عباسی نے کہا ہے کہ اگر ایم ایل ون کے لیے کوئی شراکت دار سامنے نہیں آیا تو حکومت اس منصوبے کے لیے اپنے وسائل کا استعمال کر سکتی ہے۔ لاہور ریلوے سٹیشن پر میڈیا سے بات کرتے ہوئے انہوں نے وضاحت کی کہ وزیراعظم نے ایم ایل ون منصوبے کی تعمیر کا فیصلہ کیا ہے۔ اگر کوئی اس میں ہمارا ساتھ نہیں دیتا تو ہم اسے اپنے پیسوں سے بنائیں گے۔ وہ یہ بھی بتائیں گے کہ اس منصوبے پر کب دستخط ہوں گے، اور میں آپ کو ایمانداری سے بتاؤں گا کہ کب یہ عمل مکمل ہوگا، اور جو کچھ بھی میں کہوں گا اس کا دفاع بھی کروں گا۔

حنیف عباسی نے مزید کہا کہ ہم لاہور ریلوے سٹیشن پر صفائی ستھرائی سمیت کچھ خدمات کو بہتر بنانے کے لیے آؤٹ سورس کرنے کا ارادہ رکھتے ہیں۔ خستہ حال ریلوے ٹریک کو فوری طور پر ٹھیک نہیں کروا سکتے، کیونکہ اس میں وقت لگے گا، لیکن ہم وقت کی پابندی سے متعلق مسائل کو برداشت نہیں کریں گے۔ اس لیے اگر کسی بھی ٹرین کی آمد یا روانگی میں تاخیر ہوئی تو متعلقہ ڈویژنل سپرنٹنڈنٹ کو جواب دینا ہوگا۔

اس سے پہلے وفاقی وزیر برائے ریلوے یہ بھی کہہ چکے ہیں کہ مین لائن ون منصوبے کے حوالے سے متحدہ عرب امارات کے ساتھ بات چیت جاری ہے

پاکستان تحریک انصاف کے بانی چیئرمین عمران خان کے خلاف توہینِ عدالت کی درخواست کی سماعت کے لیے مقرر کر دی گئی ہے۔ تفصیلات کے مطابق، سپریم کورٹ نے سابق وزیراعظم عمران خان کے خلاف یہ درخواست سننے کا فیصلہ کیا ہے، جہاں جسٹس امین الدین کی سربراہی میں سپریم کورٹ کا پانچ رکنی آئینی بینچ اس معاملے کی سماعت کرے گا۔ یہ سماعت 21 مارچ کو ہوگی۔

یہ درخواست وفاقی حکومت کی جانب سے دائر کی گئی تھی، جو 25 مئی 2022ء کو ہونے والے لانگ مارچ کے دوران مقررہ مقام کے بجائے ڈی چوک تک پہنچنے پر کی گئی تھی۔ پچھلی سماعت میں عدالت نے حکومت سے پوچھا تھا کہ آیا وہ اس درخواست کی مزید پیروی کرنا چاہتی ہے یا نہیں، جبکہ عمران خان کی جانب سے ان کے وکیل سلمان اکرم راجہ نے جواب جمع کروا دیا ہے۔

یہ بھی بتایا جا رہا ہے کہ عدالت نے 2022ء میں تحریک انصاف کے لانگ مارچ کے لیے مخصوص جگہ مختص کرنے کا حکم دیا تھا، اور بانی پی ٹی آئی کے وکلاء نے یقین دہانی کرائی تھی کہ وہ مقررہ مقام تک پہنچیں گے۔ تاہم، عمران خان کی قیادت میں یہ لانگ مارچ 26 مئی 2022ء کو جناح ایونیو پر اختتام پذیر ہوا۔ دوسری جانب، سائفر کیس میں عمران خان اور شاہ محمود قریشی کے خلاف کیس ثابت کرنے میں مشکلات پیش آ رہی ہیں۔