لاہور میں پنجاب حکومت نے صوبے میں پلاسٹک مصنوعات بنانے، سپلائی کرنے، اور ری سائیکل کرنے والوں کی آن لائن رجسٹریشن کا فیصلہ کر لیا ہے۔

اس فیصلے کےحوالے سے ایک بیان میں سینئر وزیر پنجاب مریم اورنگزیب نے کہا کہ صوبے میں پلاسٹک پروڈیوسرز، سپلائرز اور ری سائیکلرزکی رجسٹریشن آن لائن کرنے کا فیصلہ کر لیا گیا ہے اس فیصلے سے پلاسٹک انڈسٹری کا ڈیٹا ایک جگہ اکٹھا کیا جائے گا۔

وزیر تحفظ ماحولیات نے کہا کہ پلاسٹک کی سپلائی سائیڈ کو مکمل طور پر رسمی معیشت کا حصہ بنانا ہی مقصود ہے، اس اقدام سے ماحولیاتی آلودگی پر قابو پایا جائیگا اور معیشت میں شفافیت بھی بڑھ جائےگی۔

مریم اورنگزیب نےکہا کہ 75 مائیکرون سے کم حجم والے پولیتھین بیگز کے خلاف ایکشن بھی لیا جارہا ہے، پلاسٹک تھیلے بنانے والی 9 فیکٹریوں کو خلاف ورزی پر نوٹس جاری کر دیے ہیں جب کہ اینٹی پلاسٹک اسکواڈز فوڈ پوائنٹس، مارکیٹوں اور دکانوں کا معائنہ بھی کر رہے ہیں، پلاسٹک بیگز کا استعمال ختم کرنے کے لیے سخت بھی اقدامات کررہے ہیں، دکانداروں کو متبادل ماحول دوست بیگز استعمال کرنے کی ہدایت کی گئی ہے۔

سینئر وزیر نے کہا کہ پلاسٹک تھیلوں پر پابندی یقینی بنانے کے لیے کارروائیاں جاری رکھی جائیں گی اور محکمہ تحفظ ماحول 10 دسمبر سے اینٹی پلاسٹک مہم اور کریک ڈاؤن مزید تیز کرےگا۔

چین میں سائنس دانوں نے ایک نیا کیموفلاج مٹیریل تیار کیا ہے جو اپنے اطراف کے حساب سے رنگ تبدیل کر لیتا ہے۔ یہ مٹیریل مستقبل میں نظروں سے اوجھل کر دینے والی اشیاء بنانے میں بھی مدد دے سکتا ہے۔

کئی جانور خود کو اطراف کے ماحول میں ملانے کے لیے کیموفلاج کرنے کی صلاحیت رکھتے ہیں۔

اس عمل کی نقل کرنے والے انسان کے بنائے گئے سسٹم کافی پیچیدہ اور کئی جہتوں پر مشتمل ہوتے ہیں جس میں وہ اپنے اطراف کی شناخت کرتے ہیں، ان کی خصوصیات کو سمجھتے ہیں اور پھر اس کے مطابق تبدیلی لاتے ہیں۔

سائنس ایڈوانس میں شائع ہونے والی تحقیق میں سائنس دانوں نے کہا تھا کہ یہ کیموفلاج سسٹم برقی آلات پر بہت زیادہ انحصار کرتے ہیں جن کو پیچیدہ ساخت، مشکل استعمال اور زیادہ قیمت جیسے مسائل کا سامنا کرنا پڑتا ہے۔

تحقیق میں سائنس دانوں نے ایک نئی قسم کے مٹیریل کے متعلق بتایا ہے کہ یہ ایک خاص عمل سے گزرتے ہیں جس کو ’سیلف اڈیپٹیو فوٹو کرومزم (ایس اے پی) کہتے ہیں تاکہ آکٹوپس یا گرگٹ کی طرح اطراف کے ساتھ مکس ہو جانے کی صلاحیت حاصل کی جا سکے۔

جب ایس اے پی مٹیریل روشنی کی مخصوص ویو لینتھ کے سامنے آتے ہیں تو ان کے مالیکیول نئی ترتیب میں آ جاتے ہیں اور مٹیریل کے رنگ تبدیل ہونے کا باعث بنتے ہیں۔

سائنس دانوں کا یہ بھی کہنا ہے کہ انسانوں کے بنائے گئے گزشتہ کیموفلاجنگ سسٹم کے مقابلے میں نئے ایس اے پی مٹیریل سادہ، سستے اور استعمال میں بہت آسان ہیں۔