رائٹرز کے مطابق امریکی ٹیرف کے دباؤ کے بعد بھارت روسی خام تیل کی درآمدات میں کمی پر آمادہ ہوگیا ہے اور اب وہ امریکا سے ٹیرف کے مسئلے پر بات چیت کا منتظر ہے، تاہم امریکی صدر ڈونلڈ ٹرمپ نے واضح کر دیا ہے کہ امریکی ٹیرف تنازع حل ہونے تک بھارت سے کوئی مذاکرات نہیں ہوں گے۔ اس صورتحال میں بلوم برگ نے رپورٹ جاری کرتے ہوئے کہا کہ پاکستان اس وقت ٹرمپ کا پسندیدہ ملک بن چکا ہے جبکہ بھارت کو شدید دباؤ کا سامنا ہے۔ رپورٹ میں بتایا گیا کہ پاکستان ان چند ممالک میں شامل ہے جنہوں نے امریکا سے تجارتی معاہدہ طے کیا ہے، اور یہ رابطے اس وقت شروع ہوئے جب پاکستان اور بھارت جنگ کے قریب پہنچ گئے تھے۔ ٹرمپ نے جنگ بندی کا اعلان کیا جسے پاکستان نے سراہا جبکہ بھارت نے اس کی تردید کر دی، یہی وہ موقع تھا جب بھارت اور وائٹ ہاؤس کے تعلقات میں سردمہری پیدا ہوئی۔ بلوم برگ کے مطابق پاکستان نے ٹرمپ انتظامیہ کے ساتھ اپنے کارڈ نہایت مؤثر انداز میں کھیلے اور امریکا کے ساتھ معاہدے میں کسی ہچکچاہٹ کا مظاہرہ نہیں کیا، جب کہ پاکستان کے پاس ایسے وسائل موجود ہیں جو امریکی مفادات کے لیے انتہائی اہمیت رکھتے ہیں، جن میں دنیا کے سب سے بڑے سونے اور تانبے کے دریافت طلب ذخائر شامل ہیں۔