وزیراعلیٰ خیبرپختونخوا علی امین گنڈاپور نے سپریم کورٹ کے سینئر جج جسٹس منصور علی شاہ سے درخواست کی کہ انہیں پاکستان تحریک انصاف کے سربراہ عمران خان سے ملاقات کی اجازت دی جائے تاکہ خیبرپختونخوا اسمبلی کے جاری بجٹ سیشن کے دوران اہم فیصلوں میں رہنمائی حاصل کی جا سکے۔ وہ اپنے وکیل لطیف کھوسہ اور ایڈووکیٹ جنرل شاہ فیصل کے ہمراہ عدالت میں پیش ہوئے اور مؤقف اپنایا کہ بجٹ کی منظوری ایک سنجیدہ عمل ہے اور پارٹی سربراہ کی مشاورت ناگزیر ہے، تاہم بارہا کوششوں کے باوجود ملاقات ممکن نہیں ہو سکی۔ جس پر جسٹس منصور نے درخواست سننے سے معذرت کرتے ہوئے کہا کہ یہ معاملہ عدالت کے دائرہ اختیار میں نہیں آتا اور جوڈیشل سائیڈ پر کچھ نہیں کیا جا سکتا۔ انہوں نے مشورہ دیا کہ وزیراعلیٰ سپریم کورٹ کے رجسٹرار یا چیف جسٹس یحییٰ آفریدی سے براہ راست رجوع کریں کیونکہ یہی مؤثر اور مناسب راستہ ہوگا۔ جب لطیف کھوسہ نے معاملے کو چیف جسٹس تک پہنچانے کی استدعا کی تو جسٹس منصور علی شاہ نے ایک بار پھر دوٹوک انداز میں کہا کہ عدالتی کارروائی کے دائرے میں یہ درخواست نہیں آتی اور براہ راست چیف جسٹس یا رجسٹرار سے رجوع ہی بہتر راستہ ہے۔

ایران کے وزیر خارجہ عباس عراقچی نے واضح کیا ہے کہ ان کا ملک جوہری ٹیکنالوجی سے کسی صورت دستبردار نہیں ہوگا، کیونکہ اس کے حصول کے لیے ایرانی سائنسدانوں نے بے پناہ محنت اور قربانیاں دی ہیں۔ عرب میڈیا سے گفتگو میں وزیر خارجہ عباس عراقچی نے کہا کہ بارہ روزہ اسرائیلی جارحیت کے بعد ایران کا عزم اور بھی پختہ ہو چکا ہے، اور اب یہ بات یقینی ہے کہ کوئی بھی ایرانی شہری جوہری ٹیکنالوجی کو چھوڑنے کے حق میں نہیں ہوگا۔ انہوں نے کہا کہ ایران پر جو جنگ مسلط کی گئی، وہ درحقیقت جوہری ہتھیاروں کے جھوٹے دعووں پر مبنی تھی، حالانکہ ہمارا جوہری پروگرام پُرامن مقاصد کے لیے ہے۔ عباس عراقچی نے مزید کہا کہ ایران کے عوام نے اس پروگرام کے لیے سختیاں جھیلی ہیں اور اب ان کی قربانیوں کو ضائع نہیں ہونے دیا جائے گا۔ ان کا یہ بھی کہنا تھا کہ امریکہ نے ایران کی پُرامن جوہری تنصیبات پر حملہ کرکے بین الاقوامی قوانین کی خلاف ورزی کی، جس کے بعد ایران کا سفارت کاری سے اعتبار اٹھ گیا۔ اقوام متحدہ کی ناکامی اور دشمنوں کی غیرمربوط درخواستیں ایران کے مؤقف پر اثرانداز نہیں ہو سکتیں۔ انہوں نے ماسکو پہنچنے پر میڈیا سے گفتگو کرتے ہوئے بتایا کہ روس کا دورہ پہلے سے طے شدہ تھا، تاہم موجودہ حالات میں اس کی اہمیت بڑھ گئی ہے، کیونکہ ایران اور روس کئی بین الاقوامی معاملات پر مشترکہ موقف رکھتے ہیں۔