ایران کے سپریم لیڈر آیت اللہ خامنہ ای نے امریکی صدر ڈونلڈ ٹرمپ کی جانب سے ایران کو ہتھیار ڈالنے کی دھمکی کو دوٹوک الفاظ میں مسترد کرتے ہوئے کہا ہے کہ ایرانی قوم کبھی سرنڈر نہیں کرے گی۔ سرکاری ٹی وی پر قوم سے خطاب کرتے ہوئے انہوں نے کہا کہ امریکہ ایسی زبان اُن سے بولے جو دھمکیوں سے ڈرتے ہوں، ایران نہ دھمکیوں سے خوفزدہ ہوتا ہے اور نہ ہی امن یا جنگ اس پر مسلط کی جا سکتی ہے۔ آیت اللہ خامنہ ای نے واضح کیا کہ فضائی حدود کی خلاف ورزی پر خاموش نہیں بیٹھا جائے گا، اور اسرائیل کی جانب سے حملہ ایک سنگین غلطی تھی جس کی سزا اسے ضرور ملے گی۔

ایرانی سپریم لیڈر نے امریکی صدر کے بیان پر ردعمل دیتے ہوئے کہا کہ جنہیں ایران کی تاریخ کا علم ہے وہ جانتے ہیں کہ ایرانی قوم نہ صرف عزت نفس پر سمجھوتہ نہیں کرتی بلکہ دھمکیوں کا جواب سخت الفاظ اور عمل سے دیتی ہے۔ انہوں نے زور دے کر کہا کہ ایرانی عوام اپنے شہداء کی قربانیوں اور سرزمین پر حملے کو کبھی نہیں بھولیں گے۔

یاد رہے کہ اس سے قبل صدر ٹرمپ نے کہا تھا کہ ایران کو غیر مشروط طور پر ہتھیار ڈالنے چاہئیں، اور خبردار کیا تھا کہ ایران کی فضائی حدود، قیادت اور دفاعی نظام امریکہ کی مکمل نگرانی میں ہیں، ہم جانتے ہیں خامنہ ای کہاں موجود ہیں، لیکن انہیں قتل کرنا ہمارا مقصد نہیں۔ ٹرمپ نے دعویٰ کیا تھا کہ ایران کے پاس موجود دفاعی سازوسامان امریکہ کے سامنے کچھ نہیں۔

وزیراعظم شہباز شریف نے ایران اور اسرائیل کے درمیان جاری کشیدگی کو خطے اور عالمی امن کے لیے خطرناک قرار دیتے ہوئے عالمی برادری سے فوری مداخلت کی اپیل کی ہے۔ وفاقی کابینہ کے خصوصی اجلاس سے خطاب میں وزیراعظم شہباز شریف نے کہا کہ اسرائیل نے پاکستان کے برادر اسلامی ملک ایران پر کھلی جارحیت کی، جس کے نتیجے میں سینکڑوں افراد شہید اور متعدد زخمی ہوئے ہیں، اور جنگ بدستور جاری ہے۔ انہوں نے بتایا کہ جنگ کے آغاز کے دن ہی ان کی ایرانی صدر مسعود پزشکیان اور ترک صدر رجب طیب اردوان سے گفتگو ہوئی، جس میں پاکستان کی طرف سے مکمل یکجہتی اور حمایت کا اظہار کیا گیا۔

وزیراعظم نے کہا کہ پاکستان ہمیشہ سے خطے میں امن، استحکام اور سفارتی حل کا حامی رہا ہے، اور اس جنگ کی بھرپور مذمت کرتا ہے۔ انہوں نے امید ظاہر کی کہ ایران میں جنگ جلد ختم ہو گی۔ اس کے ساتھ ساتھ وزیراعظم نے کابینہ کو بتایا کہ آئندہ مالی سال کے بجٹ پر پارلیمنٹ میں بحث جاری ہے اور زراعت پر کوئی نیا ٹیکس نہیں لگایا گیا۔ انہوں نے بتایا کہ تنخواہوں میں 10 فیصد اضافہ کیا گیا ہے اور 6 سے 12 لاکھ روپے آمدن والوں پر صرف 1 فیصد ٹیکس لاگو ہوگا، جبکہ تنخواہ دار طبقے کو ریلیف فراہم کیا گیا ہے۔

انہوں نے بلاول بھٹو زرداری کی سربراہی میں پاکستانی وفد کی امریکہ اور یورپ میں موثر نمائندگی کو سراہا اور کہا کہ وفد نے پاکستان کا مؤقف بھرپور انداز میں پیش کیا۔ وزیراعظم نے افواجِ پاکستان کی قربانیوں کو خراج تحسین پیش کرتے ہوئے کہا کہ دہشت گردی کے مکمل خاتمے کے لیے پرعزم ہیں اور سکیورٹی اداروں کی تمام ضروریات پوری کی جائیں گی۔ انہوں نے مزید کہا کہ سخت محنت کے ذریعے معیشت کو استحکام کی جانب گامزن کر دیا گیا ہے اور 2023 میں پاکستان کو دیوالیہ ہونے سے بچایا گیا۔