سپریم کورٹ کے سینئر جج جسٹس منصور علی شاہ نے اپنے ایک حالیہ فیصلے میں کہا ہے کہ ججوں کو وقتی اور چھوٹے مفادات کے لالچ میں نہیں آنا چاہیے، چاہے وہ ترقی ہو، طاقت ہو یا ذاتی فائدہ۔ ان کا کہنا تھا کہ ججوں کو آئین کی زبان بولنی چاہیے، نہ کہ طاقتور طبقے کی۔ انہوں نے کہا کہ ایسے فوائد عارضی اور دھوکہ دہ ہوتے ہیں، اصل اجر ادارے کی ساکھ اور عوام کے اعتماد کو برقرار رکھنے میں ہے۔

یہ ریمارکس انہوں نے فیڈرل پبلک سروس کمیشن کی ایک درخواست مسترد کرتے ہوئے دیے، جس میں ایک خاتون اسسٹنٹ پروفیسر کی تقرری محض شادی کے بعد ڈومیسائل کی تبدیلی کی بنیاد پر منسوخ کی گئی تھی۔ جسٹس منصور علی شاہ نے جسٹس عقیل احمد عباسی کی توثیق سے تحریر کردہ فیصلے میں کہا کہ سپریم کورٹ صرف تنازعات کے حل کا ادارہ نہیں بلکہ قوم کا آئینی ضمیر ہے، جس کا کام ایک ایسی ترقی پسند اور اصولی فقہ تیار کرنا ہے جو آئین کو زندہ رکھے اور عوام کی بدلتی ضروریات سے ہم آہنگ ہو۔

انہوں نے زور دیا کہ عدلیہ کو کسی بھی بیرونی یا اندرونی دباؤ کا شکار ہوئے بغیر، آئین کی بالادستی اور قانون کی حکمرانی کا تحفظ کرنا ہوگا۔ ان کا کہنا تھا کہ اگر کوئی جج آئینی اصولوں پر سمجھوتہ کرتا ہے، تو تاریخ اسے انصاف کے علمبردار کے بجائے ناانصافی کے ساتھی کے طور پر یاد رکھے گی۔ اندرونی تنقید کو غداری نہیں بلکہ ادارے سے وفاداری قرار دیتے ہوئے جسٹس منصور علی شاہ نے کہا کہ عدلیہ کو جمہوری اقدار کا محافظ بننا ہوگا، نہ کہ مصلحت کا آلہ۔

سینیٹ کی قائمہ کمیٹی برائے خزانہ نے آن لائن اکیڈمیز پر ٹیکس عائد کرنے کی تجویز منظور کرلی ہے۔ چیئرمین کمیٹی سلیم مانڈوی والا کی زیر صدارت اجلاس میں چیئرمین ایف بی آر راشد لنگڑیال نے انکشاف کیا کہ بعض آن لائن اکیڈمیز دو کروڑ روپے ماہانہ تک کما رہی ہیں، اس لیے ان پر ٹیکس لگانا ضروری ہے۔ انہوں نے کہا کہ اگر کوئی ٹیچر آن لائن تعلیم سے آمدنی حاصل کر رہا ہے تو اسے بھی ٹیکس دینا ہوگا۔

اجلاس میں کلبز کی آمدنی پر بھی ٹیکس لگانے کی تجویز دی گئی، تاہم چیئرمین کمیٹی نے اس کی مخالفت کی، مگر دیگر ممبران نے حمایت کرتے ہوئے کہا کہ یہ سہولت صرف چند سو افراد کی عیاشی کا ذریعہ ہے، جس پر ٹیکس عائد ہونا چاہیے۔ وزیر مملکت برائے خزانہ بلال اظہر کیانی نے کہا کہ ٹیکس صرف اسی وقت لگایا جائے گا جب کسی ادارے یا فرد کی آمدنی اخراجات سے زیادہ ہو۔

اس کے علاوہ ایف بی آر نے نان فائلرز کے لیے جائیداد کی خریداری پر پابندی کا عندیہ دیتے ہوئے بتایا کہ آئندہ بجٹ میں نان فائلرز کے لیے پراپرٹی خریدنے کی 130 فیصد حد مقرر کی جا رہی ہے۔ سینیٹر محسن عزیز نے اس حد کو ناکافی قرار دیتے ہوئے تجویز دی کہ نان فائلرز کو ان کی آمدنی سے 500 فیصد زیادہ مالیت کی پراپرٹی خریدنے کی اجازت دی جائے، جسے کمیٹی نے منظور کر لیا۔

وزیر خزانہ محمد اورنگزیب نے بتایا کہ نان فائلرز کو ٹیکس نیٹ میں لانے کے لیے سخت اقدامات کیے جا رہے ہیں اور ان پر گزشتہ سال جرمانے بھی بڑھائے گئے تھے۔ کمیٹی نے آن لائن تعلیم دینے والے پلیٹ فارمز کو بھی باقاعدہ ٹیکس نیٹ میں لانے کی منظوری دے دی۔