کراچی سے تعلق رکھنے والی شوبز انڈسٹری کی معروف اداکارہ عنایا خان نے ایک نجی ٹی وی شو میں گفتگو کرتے ہوئے انکشاف کیا ہے کہ افغانستان کے اسٹار لیگ اسپنر راشد خان نے سوشل میڈیا پر ان سے رابطہ کیا تھا۔ عنایا خان کے مطابق راشد خان نے انہیں اسنیپ چیٹ پر ایڈ کیا، جہاں دونوں کے درمیان بات چیت بھی ہوئی۔ اداکارہ نے بتایا کہ راشد نے ان سے دریافت کیا کہ “کیا آپ اداکارہ ہیں؟”، اور ان کی تصاویر دیکھ کر اندازہ لگایا کہ وہ شوبز سے وابستہ ہیں۔

عنایا نے مزید بتایا کہ راشد خان اب بھی ان کے اسنیپ چیٹ پر موجود ہیں اور ان کا رابطہ ایک مشترکہ دوست کے ذریعے ہوا تھا۔ انہوں نے بتایا کہ راشد خان نہ صرف خیریت دریافت کرتے ہیں بلکہ ان کی شوٹنگ سے متعلق سوالات بھی کرتے ہیں، ساتھ ہی پاک بھارت میچز پر بھی دونوں کے درمیان تبادلہ خیال ہوتا ہے۔

پروگرام میں گفتگو کے دوران عنایا خان نے اپنے آئیڈیل مرد کے بارے میں بھی بات کی اور کہا کہ انہیں ایسے لڑکے پسند ہیں جو خاموش طبیعت کے حامل ہوں اور جن کا قد لمبا ہو۔

یاد رہے کہ راشد خان نے اکتوبر 2023 میں کابل میں شادی کی تھی، جس کی تصاویر سوشل میڈیا پر وائرل ہوئیں۔ یہ شادی پشتون روایات کے مطابق انجام پائی تھی، جس میں افغانستان کرکٹ ٹیم کے سابق کپتان محمد نبی سمیت کئی کھلاڑیوں نے شرکت کی تھی۔

چیف آف آرمی اسٹاف فیلڈ مارشل عاصم منیر نے کہا ہے کہ بیرون ملک مقیم پاکستانی ہمارے قیمتی اثاثے ہیں جو پاکستان کی معیشت کو مستحکم کرنے میں اہم کردار ادا کر رہے ہیں۔ پاک فوج کے شعبہ تعلقات عامہ (آئی ایس پی آر) کے مطابق، آرمی چیف ان دنوں امریکہ کے سرکاری دورے پر ہیں اور واشنگٹن ڈی سی میں انہوں نے اوورسیز پاکستانی کمیونٹی سے ملاقات کی۔ اس موقع پر بڑی تعداد میں پاکستانیوں نے ان کا پرتپاک استقبال کیا اور مسلح افواج کی پیشہ ورانہ مہارت اور بہادری کو خراج تحسین پیش کیا، خصوصاً آپریشن بنیان مرصوص / مارکہ حق کے دوران فوج کی شاندار کارکردگی کو سراہا گیا۔

فیلڈ مارشل عاصم منیر نے بیرون ملک پاکستانیوں کی وطن سے وابستگی اور مثبت کردار کی تعریف کی، خاص طور پر ترسیلات زر، سرمایہ کاری، اور پاکستان کی بین الاقوامی ساکھ بہتر بنانے میں ان کی خدمات کو سراہا۔ انہوں نے اس بات پر زور دیا کہ اوورسیز پاکستانی پاکستان کے غیر سرکاری سفیر ہیں اور ان کا متحرک کردار ملک کے لیے باعث فخر ہے۔

بات چیت کے دوران تارکین وطن نے بھی آرمی چیف سے اپنے خیالات، تجربات اور تجاویز کا تبادلہ کیا اور باہمی تعاون کے فروغ کی ضرورت پر زور دیا۔ آرمی چیف نے سمندر پار پاکستانیوں کے ساتھ روابط کی اہمیت کو اجاگر کرتے ہوئے یقین دلایا کہ افواج پاکستان قومی ترقی اور تحفظ کے لیے ہر ممکن اقدام کرتی رہے گی۔ ملاقات کا اختتام ایک پرعزم عہد کے ساتھ ہوا کہ مل کر ایک محفوظ، خوشحال اور مستحکم پاکستان کے لیے کام کیا جائے گا۔